Չնայած ԱԺ պրոֆիլային հանձնաժողովի բացասական եզրակացությանը՝ «Լուսավոր Հայաստան» կուսակցությունը հանդես է գալիս երկրում ռազմական դրության ռեժիմի չեղարկման նախաձեռնությամբ: Այս մասին այսօր ԱԺ արտահերթ նիստում «Ռազմական դրության ռեժիմի չեղարկման մասին» օրինագծի քննարկման ժամանակ հայտարարեց «Լուսավոր Հայաստան» խմբակցության քարտուղար Գեւորգ Գորգիսյանը:
Նրա խոսքով՝ այլեւս անհրաժեշտություն չկա պահպանել ռազմական դրության ռեժիմը, քանի որ սպառնալիքները, որոնց հետ կապված սահմանվել էր տվյալ ռեժիմը, այլեւս չկան: Պատգամավորը նաեւ նշեց, որ ռազմական դրության ռեժիմի երկրարաձգումը բացասաբար է ազդում առանց այդ էլ բարդ տնտեսական իրավիճակի վրա: Նրա խոսքով՝ զորամասերում գտնվող աշխատունակ քաղաքացիները, որոնք լավ կրթություն, մասնագիտություն, աշխատանք ունեն, այժմ անգործ են եւ տնտեսապես չեն օգնում երկրին: Այնուամենայնիվ, Գորգիսյանը նկատեց, որ այդ մարդկանց պետք է աջակցել, եւ դրա համար, բնականաբար, հարկատուների եւ պետության ռեսուրսներ են պահանջվում:
«Հիշեցնենք, որ նոյեմբերի 9-ին Հայաստանի,Ռուսաստանի եւ Ադրբեջանի կողմից հայտարարություն է ստորագրվել Արցախում մարտական գործողությունները դադարեցնելու մասին: Դրանից հետո կողմերը հայտարարել են, որ անվտանգության հարցը կարելի է լուծված համարել: Նրանք երաշխիքներ են տվել, եւ Արցախում ռուս խաղաղապահներ են տեղակայվել»,-պարզաբանեց նա:
Գորգիսյանը նաեւ նշեց, որ նոյեմբերի 10-ին «Լուսավոր Հայաստանի» ղեկավար Էդմոն Մարուքյանը հանդիպել է Հայաստանի Զինված ուժերի գլխավոր շտաբի պետի հետ եւ այդ ժամանակ նրան վստահեցրել են, որ ՊՆ-ին եւս 7 օր է անհրաժեշտ առկա հարցերը լուծելու համար, ինչից հետո արդեն հնարավոր է բարձրացնել ռազմական դրության ռեժիմի չեղարկման հարցը: Սակայն պատգամավորը նշեց, որ այսօր արդեն նոյեմբերի 25-ն է, այսինքն՝ ՊՆ-ին եւ ԳՇ-ին բավականին երկար ժամանակ է տրվել խնդիրները լուծելու համար:
Նա կոչ արեց պատգամավորներին չեղարկել ռազմական դրության ռեժիմն ու դրանից բխող բոլոր սահմանափակումները:
