Բելառուսի նախագահ Ալեքսանդր Լուկաշենկոն դրական է գնահատել Ռուսաստանի քայլերն ու դերը Լեռնային Ղարաբաղում հակամարտության կարգավորման գործընթացում: Այս մասին Բելառուսի պետության ղեկավարն ասել է Ռուսաստանի արտգործնախարար Սերգեյ Լավրովի հետ հանդիպմանը, փոխանցում է «Բելտա»-ն:
«Շատ կցանկանայի շնորհավորել Ձեզ Կովկասում տեղի ունեցածի կապակցությամբ: Ապրեք: Հասկանալի է, որ առանց ծախքերի չի լինում. կլինի քննադատություն, ամեն ինչ կլինի: Բայց այն, որ հիմնականում Ռուսաստանի շնորհիվ այս ջարդը դադարեցվեց, որ մարդիկ այնտեղ չեն մահանում եւ որ, չնայած ճանապարհի սկզբում ենք, սկսել ենք Կովկասում հարաբերությունների կարգավորման այս երկար ճանապարհը, դա շատ դրական եւ լավ նշան է: Մենք դիրքորոշումը հենց այսպիսին է»,- ասել է Բելառուսի ղեկավարը:
Լուկաշենկոն պատմել է, որ իսկզբանե խորասուզված էր Կովկասի տարածաշրջանի խնդիրների մեջ, լավ գիտի դրանք, եւ այդ թեման բազմիցս քննարկել է Ռուսաստանի, Հայաստանի եւ Ադրբեջանի ղեկավարների հետ: «Ես շատ գոհ եմ, որ այսպես լուծվեց այս ճգնաժամը, ինչպես մենք ժամանակին քննարկում էինք (վերջին անգամ` Սանկտ Պետերբուրգում): Ուստի անկեղծորեն շնորհավորում եմ ձեզ»,- ասել է նա:
Միեւնույն ժամանակ, նա ուշադրություն հրավիրեց այլ խնդիրների եւ կոնֆլիկտային իրավիճակների առկայության վրա: «Ժամանակակից աշխարհում շատ մարտահրավերներ կան: Դուք գիտեք դրանք: Եվ դուք պետք է իմանաք, որ մենք միշտ պատրաստ ենք գնալ մեր ճանապարհով, եթե Ռուսաստանը ցանկանա` Ռուսաստանի հետ միասին, հաղթահարելով այդ խնդիրները` համավարակից մինչեւ բոլոր տեսակի պահանջներ, առաջին հերթին` Ամերիկայի Միացյալ Նահանգների կողմից աշխարհում միանձնյա գերիշխանության վերաբերյալ: Մենք դա երբեք չենք ողջունել եւ չենք ողջունի»,- շեշտել է Լուկաշենկոն: