Երեւանում այսօր` հունիսի 1-ին իր աշխատանքներն է սկսել Կապի տարածաշրջանային համագործակցության (ԿՏՀ) 44-րդ նիստը եւ Անկախ պետությունների համագործակցության անդամ պետությունների տեղեկատվայնացման հարցերով համակարգող խորհրդի 17-րդ նիստը:
ՀՀ տրանսպորտի եւ կապի նախարար Մանուկ Վարդանյանի տեղեկացմամբ` նիստում քննարկվելու են 3 հիմնական ուղղություններ` փոստային կապ, էլեկտրոնային կապ, արբանյակային կապ: Իսկ լրագրողների հետ ճեպազրույցում Ռուսաստանի կապի եւ զանգվածային հաղորդակցության նախարար Իգոր Շոգոլեւն ասաց, որ հաջորդ տարի սպասվում են 2 կարեւոր միջազգային միջոցառումներ, ու որոշ հարցերում ցանկալի է ԿՏՀ անդամ պետությունների կողմից կոորդինացված տեսակետի արտահայտումը:
Ի. Շոգոլեւի խոսքով` Հայաստանի վարչապետի հետ հանդիպման ժամանակ քննարկվել են առաջին հերթին լայնաշերտ ինտերնետի հասանելիությունը 2 երկրների ողջ տարածքում, մասնավորապես` ինչ մոդելներ դրա համար պետք է օգտագործել, հաշվի առնելով, որ 2 երկրների միջեւ պայմանները տարբեր են, ու մոդելները եւս կարող են տարբերվել: Քննարկման առարկա են դարձել նաեւ կապի նոր սերունդների` երրորդ եւ չորրորդ սերունդների ակտիվ ներթափանցումը:
Նշենք, որ ԿՏՀ անդամ Ադրբեջանի պատվիրակությունը Երեւան չի ժամանել:
Հիշեցնենք, որ ԿՏՀ-ն հիմնադրվել է 20 տարի առաջ` 1991 թ. դեկտեմբերի 17-ին Մոսկվայում, ` նորանկախ պետությունների կապի վարչակազմերի կողմից: ԿՏՀ-ն ունի 12 լիիրավ անդամ` Հայաստան, Ադրբեջան, Բելառուս, Վրաստան, Ղազախստան, Ղրղստան, Մոլդովա, Ռուսաստան, Տաջիկստան, Թուրքմենստան, Ուզբեկստան, Ուկրաինա:
