News
Լրահոս
News
Ուրբաթ
Մարտ 29
Տեսնել լրահոսը

Վրաստանի խորհրդարանի տասներորդ գումարման նստաշրջանի առաջին նիստի օրը ընդդիմադիր կուսակցությունները կստորագրեն պաշտոնական հայտարարություն՝ օրենսդիր մարմինը բոյկոտելու մասին, եւ հետ կկանչեն իրենց կուսակցական ցուցակները: Այս մասին այսօր հայտարարել է «Եվրոպական Վրաստան» կուսակցության առաջնորդ Դավիթ Բաքրաձեն, հաղորդում է «Նովոստի-Գրուզիան»:

2020-ի խորհրդարանական ընտրությունների արդյունքներով՝ իշխող «Վրացական երազանք» կուսակցությունը օրենսդիր մարմնում ստացել է ամենաշատ տեղերը՝ 90: Մնացած 60 տեղերը բաշխվել են ութ ընդդիմադիր ուժերի մեջ: Նրանք բոլորը կարծում են, որ հոկտեմբերի 31-ի քվեարկության արդյունքները կեղծվել են, եւ պահանջում են արտահերթ ընտրություններ:

Այսօր «Վրաստանի լեյբորիստական կուսակցության» գրասենյակում ընդդիմության հանդիպումն անցկացվել է ընդլայնված կազմով: Բանակցությունների սեղանի շուրջ հավաքվել են ինչպես այն կուսակցությունները, որոնք ներկայացվածություն են ստացել օրենսդիր մարմնում, այնպես էլ նրանք, ովքեր չեն հաղթահարել 1%-ի անցումային շեմը:

«Այն պատգամավորները, ովքեր անցել են խորհրդարան,  խորհրդարան մտնելու մերժում կստորագրեն: Այնուհետեւ կուսակցությունները չեղյալ կհայտարարեն իրենց կուսակցական ցուցակները եւ նոր ընտրությունների վերաբերյալ հայտարարություն կստորագրեն»,- հանդիպումից հետո ասել է Բաքրաձեն:

Նա բացատրել է, որ դա տեղի կունենա այն բանից հետո, երբ Վրաստանի ԿԸՀ-ն ամփոփի ընտրությունների վերջնական արդյունքները, եւ հայտնի դառնա խորհրդարանի առաջին նիստի օրը:

Ընդդիմությունը ստիպված որոշակի ճշգրտումներ է մտցրել իր ծրագրերում`COVID-19-ի դեմ նոր սահմանափակումների պատճառով: Չեղյալ է հայտարարվել լայնամասշտաբ բողոքի ակցիան, որը պլանավորվել էր պատգամավորների աշխատանքի մեկնարկին զուգահեռ:

«Մենք քննարկում ենք բողոքի տարբեր ձեւեր: Ամենայն հավանականությամբ, դա խորհրդանշական կլինի»,- ասել է «Միացյալ ազգային շարժում» կուսակցության առաջնորդներից մեկը` Թինա Բոկուչավան:

«Վրացական երազանքն» այս շաբաթ հայտարարել է, որ իրենք միակուսակցական խորհրդարանում խնդիրներ չեն տեսնում: Այնուամենայնիվ, իշխող թիմը հույս ունի, որ ընդդիմադիր որոշ կուսակցություններ դեռ կհրաժարվեն բոյկոտից:

ԱՄՆ եւ ԵՄ դեսպանները փորձում են օգնել լուծել քաղաքական ճգնաժամը, որն առաջացել է այն պատճառով, որ ընդդիմությունը չի ճանաչել ընտրությունների արդյունքները: Արեւմտյան դիվանագետները բանակցությունների սեղանի շուրջ են հավաքել խորհրդարան անցած բոլոր ինը կուսակցությունների ներկայացուցիչներին: Առաջիկա օրերին պետք է տեղի ունենա երկխոսության երրորդ փուլը: Ընդդիմությունը հայտարարում է, որ «Վրացական երազանք»-ից նոր ընտրությունների վերաբերյալ կոնկրետ առաջարկ է ակնկալում:

!
Այս նյութը հասանելի է նաև   Русский
Տպել
Ամենաշատ