Ինչպես խոստացել էի, հանգամանքները պարզելուց հետո ևս մեկ անգամ կանդրադառնամ ռազմական բժիշկ Տարոն Տոնոյանի հայտարարությանը: Այս մասին Facebook-ի իր էջում գրել է ԱԺ «Իմ քայլը» խմբակցության պատգամավոր Հովիկ Աղազարյանը:

Նա, մասնավորապես, նշել է. «Օրերս հանդիպել եմ Տարոն Տոնոյանի կողմից հիշատակած անձնավորությանը՝ Կարեն Այվազյանին: Նա նոյեմբերի 25-ին վերադարձել է մարտական դիրքերից: Իր հետ զրուցելուց և բոլոր փաստաթղթերին ծանոթանալուց հետո ես համոզվեցի, որ նա լսել է իմ հորդորը, և Բերձորում իրեն թողնելուց հետո իր գործողություններն, իմ համոզմամբ, եղել են օրինականության շրջանակում:

Բերձորում բուժօգնություն և հետագայում Երևանում անհրաժեշտ բուժում ստանալուց հետո Կարեն Այվազյանը վերադարձել է մարտական դիրքեր:

Հարկ եմ համարում նշել նաև, որ Կարեն Այվազյանը չի մասնակցել Տարոն Տոնոյանի կողմից հիշատակած հանրահավաքին:

Տարոն Տոնոյանի հայտարարության վերաբերյալ դիմել եմ ՀՀ գլխավոր դատախազին՝ հայտարարության մեջ նշված փաստերն ուսումնասիրելու և իրավական գնահատական տալու համար:

Եթե Տարոն Տոնոյանը 5 օրվա ընթացքում հադես չգա հրապարակային հերքմամբ, պատրաստվում եմ դիմել նաև դատարան»:

Հիշեցնենք, որ նոյեմբերի 21-ին, Ազատության հրապարակում վարչապետ Նիկոլ Փաշինյանի հրաժարականի պահանջով անցկացվող հանրահավաքին ռազմական բժիշկ Տարոն Տոնոյանը հայտարարել էր, թե  «Իմ քայլը» խմբակցության պատգամավոր Հովիկ Աղազարյանը փախցրել է Արարատի մարզպետարանի աշխատակցի եղբորը, ով վերջերս նաև կառավարության դիմաց իր ընկերների հետ պաշտպանել էր Նիկոլ Փաշինյանին։ Արձագանքելով Տարոն Տոնոյանի այդ հայտարարությանը, Հովիկ Աղազարյանը ֆեյսբուքի իր էջում գրել էր, որ տվյալ անձն իր օգնությամբ չի հատել անցակետը, ապա խոստացել էր հետամուտ լինել այդ անձի հետ կապված դեպքի հետագա զարգացումների բացահայտմանը։

Հովիկ Աղազարյանն ասեց՝ ի՞նչ ես խոսում, Ջաբրաիլը մեր ձեռքում ա․ Տարոն Տոնոյանը պատմեց մի դեպքի մասին

Հովիկ Աղազարյանը խոստովանել է՝ ինքն է Բերձոր հասցրել Արարատի մարզպետարանի աշխատակցի եղբորը, հետո իջեցրել է մեքենայից