Հայաստանում ծնված և մեծացած մարդու համար այս ամենը տեսնելը շատ դաժան է: Այս մասին այսօր՝ նոյեմբերի 30-ին, լրագրողների հետ զրույցում մտավորականների միաբանության երթին մասնակցող դերասան Աշոտ Ղազարյանը:
«Մարդիկ ասում են՝ գոնե իմանանք երեխես ողջ է թե ոչ: Գիշեր-ցերեկ չունեն այդ մարդիկ: Երկուսի հետ զրուցել եմ: Ահավոր է: Սա է ինձ բերել այստեղ: Ես էլ չեմ կարողանում քնել: Ուզում ենք ինչ-որ չափով ժողովրդին սթրեսից հանենք: Գնում ենք նկարահանման հրապարակ, տեսնում ենք՝ ոչ մեկը տրամադրություն չունի: Տեսարան կա՝ ժպտում ես, ուրախ խոսում ես, բայց ներսդ վառվում է: Այն մարդու համար, որն այս հող ու ջրին կպած է, ծնվել է ու մեծացել է այստեղ, ու երևի այստեղ էլ կվերջացնի իր կյանքը , շատ դաժան է», -ասաց Աշոտ Ղազարյանը:
Աշոտ Ղազարյանը շեշտեց, որ կազմակերպված երթում որևէ քաղաքական նկատառում չկա:
«Իշխանությունը շատ բան պետք է անի, դե հիմա լռում են, գոնե մենք ինչ-որ բան պետք է շարժենք: Ես 71 տարեկան եմ, լսել կամ տեսե՞լ եք, որ ես որևէ քաղաքական բանի մասնակցեմ: Ես քաղաքականություն երբեք չեմ սիրել և երբեք չեմ հասկացել: Սա հայի՝ իսկական, էմոցիանալ, ճիշտ շարժում է, որին ես մեծ սիրով մասնակցում, որ գոնե տեսնենք ինչ կարող ենք անել», - նշեց դերասանը: