Առողջապահության համաշխարհային կազմակերպությունը (ԱՀԿ) գրանցել է Եվրոպայում COVID-19-ի նոր դեպքերի թվի անկում, ինչը նախորդ շաբաթ հանգեցրել է սեպտեմբերի սկզբից նոր վարակների թվի առաջին գլոբալ նվազմանը: Այս մասին ճեպազրույցում ասել է ԱՀԿ գլխավոր տնօրեն Թեդրոս Ադանոմ Գեբրեեսուսը, հաղորդում է «ՌԻԱ Նովոստին»:
«Անցյալ շաբաթ աշխարհում սեպտեմբերի սկզբից նոր դեպքերի առաջին անկումն էր՝ Եվրոպայում դեպքերի թվի նվազման հետեւանքով, ինչը տեղի է ունեցել ներդրված արդյունավետ, բայց ծանր միջոցների շնորհիվ: Սա լավ նորություն է, բայց մենք պետք է դա շատ զգուշորեն մեկնաբանենք»,- ասել է նա:
Նրա խոսքով՝ COVID-19-ի դեպքերի թիվը, ինչպես նաեւ վիրուսից մահացությունների թիվը շարունակում է աճել աշխարհի այլ տարածաշրջաններում: Այս կապակցությամբ ԱՀԿ գլխավոր տնօրենը Ամանորի տոներին ընդառաջ կոչ է արել պատասխանատվություն ցուցաբերել եւ գնահատել, թե որքանով անվտանգ կլինի տոնակատարությունը համավարակի ժամանակ: