Վարչապետ Նիկոլ Փաշինյանի հրաժարականի պահանջով բողոքի ակցիան Կառավարության բակում ավարտվեց։
Լրագրողների հետ զրույցում ՀՅԴ ԵՄ անդամ Քրիստինե Վարդանյանը նշեց, որ իրենց բողոքի ակցիաները կարունակշեն այնքան ժամանակ, մինչեւ Նիկոլ Փաշինյանը հրաժարական ներկայացնի։
«Ձեր հեռանալու համար անելու ենք մեր ուժերի ներածին չափով ամեն ինչ։ Դա տեսնելու եք, վաղը, մյուս օրը, հաջորդ շաբաթ մինչեւ դավադիր իշխանությունները չհասկանան, որ իրենց տեսակը Հայաստանի Հանրապետությունում մերժվել է առհավետ։ Այստեղ կամփոփենք մեր խնդիրները եւ կտեղեկացնենք հայ հանրությանը, որ յուրաքանչյուրը, ով հայրենիք ունի, ով մտածում է պետականամետ, ուրեմն գործ ունի անելու։ Միացեք պայքարին, վաղն արդեն ուշ է լինելու։ Նիկոլ Փաշինյանի յուրաքանչյուր րոպեն ավել պաշտոնավարումը սպառնում է մեր գոյությանը այս տարածաշրջանում»,- հայտարարեց նա։
Նշենք, որ Նիկոլ Փաշինյանի հրաժարականի պահանջով քաղաքացիները ակցիայի սկզբում փակել էին Մաշտոցի պողոտան, որի ընթացքում էլ բերման էր ենթարկվել 35 ցուցարար։ Այնուհետեւ նրանք Մաշտոցի պողոտայից երթով շարժվել էին դեպի Կառավարության բակ։
