News
Լրահոս
News
Երեքշաբթի
Մարտ 19
Տեսնել լրահոսը


Մինչեւ այս պահը Ադրբեջանի զինուժը շարունակում է առեւանգել կամ գերեվարել Արցախի հայ բնակիչների կամ զինծառայողների։ Նոյեմբերի 30-ին Ասկերանի շրջանի Խրամորթ գյուղի բնակիչներ Ադեմնիկ  Համբարձումյանի և Ռամիդ Խաչատուրյանի անհետացումից հետո նրանց ճակատագրով զբաղվել են ռուս խաղաղապահները, ադրբեջանցիների հետ բանակցություններից հետո, հայ քաղաքացները վերադարձվել են։ Ռուս խաղաղապահները ռազմական ինքնաթիռով նրանց տեղափոխել են Երևան:

Թե՛ հայկական, թե՛ ադրբեջանական կողմերը գերիների ցուցակները փոխանցել են Կարմիր Խաչի Միջազգային Կոմիտեին։ Այս մասին հայտնում են փոխվարչապետ Տիգրան Ավինյանի գրասենյակից։ Այժմ ընթանում է ցուցակների ճշտման գործընթացը:

Militarist Telegram ալիքը հաղորդում է, որ թուրքական հետախուզական ծառայությունն իր սիրիացի վարձկաններին հրաման է տվել շարժվել դեպի Ադրբեջանի վերահսկողության տակ անցած՝ Ղարաբաղի տարածքների խորքը։ Տարածաշրջանում նոր բախումների դեպքում սեփական մարդիկ ունենալու ցանկության հետ միասին թուրքական հետախուզությունը նախատեսում է նաեւ բնակեցնել նոյեմբերի 10-ի պայմանագրով հայ բնակչության կողմից լքված տարածքները: Այդպես, «Սուլթան Մուրադի անվան» դիվիզիայի զինյալները (հիմնականում թուրքմեններ) ոչ միայն պարգեւատրում են ստանում տեղում մնալու համար, այլ նաեւ` ֆինանսական եւ նյութատեխնիկական օգնություն` իրենց ընտանիքներին Սիրիայից տեղափոխելու համար: Տեղեկություններ կան, որ թուրքական հետախուզությունը նույնիսկ գրասենյակ է բացել սիրիական Աֆրինում` այդ նպատակներով մարդկանց հավաքագրելու համար:

Ռուս խաղաղապահները հնարավոր ամեն ինչ անում են Լեռնային Ղարաբաղում խաղաղությունը պահպանելու համար, նրանց ջանքերի շնորհիվ արդեն Ստեփանակերտ են վերադարձել 30 հազարից ավելի բնակիչներ, հայտարարել է  Ռուսաստանի պաշտպանության նախարար Սերգեյ Շոյգուն։ «Հակամարտության գոտում ռուս խաղաղապահների տեղակայումը թույլ է տվել կարգավորել տարածաշրջանում իրավիճակը։ Հրադադարի մասին եռակողմ հայտարարության պայմանները պահպանվում են»,– ասել է բանակի գեներալը։

Ռուսաստանի խաղաղապահներն ու մարդասիրական առաքելությունը Լեռնային Ղարաբաղում իրենց գործողությունները համակարգում են ինչպես Հայաստանի, այնպես էլ Ադրբեջանի հետ, հայտարարել է Ռուսաստանի նախագահի մամուլի քարտուղար Դմիտրի Պեսկովը: Նա նշել է նաեւ, որ Ռուսաստանը չի փոխել Ղարաբաղի կարգավիճակի հարցով իր դիրքորոշումը: Այդ տարածքի պատկանելությունը վաղուց որոշված է Անվտանգության խորհրդի բանաձեւերով: «Ղարաբաղը չի ճանաչվել, այն չի ճանաչել նույնիսկ Հայաստանը»,- հիշեցրել է Կրեմլի ներկայացուցիչը:

Համացանցում տասնյակներով տարածվող հայ գերիների մասնակցությամբ դաժան տեսարաններով կադրերի պայմաններում, ադրբեջանցի զինծառայողները ելումուտ են անում հայկական բնակավայրեր, օրինակ, ըստ ականատեսների՝ առևտուր անում Ստեփանակերտի սուպերմարկետներում։ Այս մասին Facebook-ի իր էջում գրել է Արցախի նախագահի նախկին խորհրդական Տիգրան Աբրահամյանը՝ ավելացնելով, «Ճիշտ է՝ դա տեղի է ունենում ռուս խաղաղապահների ուղեկցությամբ, սակայն դա այս պարագայում քիչ բան է փոխում»։

Երբ թշնամի երկիրը տեսնում է, որ քո երկրի ղեկավարը խամաճիկ է, անողնաշար, մեծամիտ, ունակ չէ որեւէ բան ղեկավարելու, ինքը պատեհ առիթ է փնտրում, որ կարողանա մաքրել 25-30 տարի իր ճակատի պարտության խարանը, այսօր հայտարարել է «Սիսական» ջոկատի հրամանատար Աշոտ Մինասյանը: «Երբ երկրի պաշտոններից հեռացնում են  վաստակած հրամանատարներին, հեռացնում են ամբողջ գեներալիտետին, որոնք կռել էին երկու հաղթանակ, եւ ասպարեզ են բերում մարդկանց, որոնք ունակ չեն պատերազմ վարելու, բնականաբար իրենք պետք է պարտություն կրեին»,- ասել է Մինասյանը:

Հայաստանում ստեղծված իրավիճակից միայն մեկ ճիշտ ելք կա` անարյուն իշխանափոխություն, հայրենակիցներին հղած ուղերձում շեշտել է գործարար եւ բարերար Սամվել Կարապետյանը։ «Հայաստանի գործող կառավարությունը չկարողացավ կառավարել հայկական պետականությունը, ապահովել հայկական բանակի մարտունակությունը եւ Արցախի ժողովրդի անվտանգությունը: Նրա վարած ներքին եւ արտաքին քաղաքականությունը աղետի հանգեցրեց: Մենք չենք կարող ժամանակ կորցնել, Փաշինյանն ու նրա կառավարությունն այլեւս ի վիճակի չեն հայ հասարակության էներգիան դնել կառուցողական հունի մեջ, համախմբել ժողովրդին եւ անցնել մեր առջեւ կանգնած լուրջ խնդիրների լուծմանը: Մենք պետք է ամենակարճ ժամկետներում սկզբունքորեն նոր օրակարգ ձեւավորենք եւ սկսենք Հայաստանի եւ Արցախի վերածնունդը: Վստահ եմ, որ մենք կարող ենք դա անել: Առջեւում մեր հաղթանակների ժամանակն է, եւ մենք այն բաց թողնելու իրավունք չունենք», նշել է Կարապետյանը:

Պաշտպանության բանակի նախկին հրամանատար, Արցախի հերոս Ջալալ Հարությունյանը դուրս է գրվել հիվանդանոցից: Գեներալի վիճակը նորմալ է, կազդուրման փուլում է։ Տնային պայմաններում դեռ որոշ ժամանակ կբուժվի:

«Իմ քայլի» պատգամավոր Արգիշտի Մեխակյանը, երեկ գիշեր վայր դնելով  մանդատը, հայտարարեց, թե չի կարող հաշտվել Արցախում պատահածի հետ, այն համարում է իր անձնական  և ընտանեկան ողբերգությունը։ Նա Արցախն ազատագրած լեգենդար հրամանատար Մեխակ Մեխակյանի որդին է, և նա առաջինն էր, որը պարտության խայտառակ հայտարարությունից հետո ակնկալվում էր, որ կհեռանա իշխող խմբակցությունից։ Թվում էր, թե նա որոշումն արդեն կայացրել է, բայց կարճ ժամանակ անց հայտնի է դարձավ, որ Արգիշտի Մեխակյանը ոչ թե հողերը հանձնած իշխանությունից է հեռանում, այլ ընդամենը օրենսդրական գործունեությունից, և նշանակվում է Արմավիրի փոխմարզպետ։

Ընդդիմության վաղվա հանրահավաքից կես ժամ առաջ ԲՀԿ առաջնորդ Գագիկ Ծառուկյանը ԱԱԾ-ում հարցաքննության կենթարկվի։ Հանրահավաքը ժամը 15-ին է, Ծաուկյանը ԱԱԾ քննչական դեպարտամենտ պետք է ներկայանա 14։30-ին։ «Քաղաքական հետապնդումների եւ իրականությունից կտրված լինելու եւս մեկ ցայտուն փաստ», հայտարարել է Ծառուկյանի պաշտպաններից Էմին Խաչատրյանը։

Երևանի պետական համալսարանի դեկանները ԱԺ-ից պահանջել են անհապաղ հետ կանչել բուհերի ռեկտորներին նշանակելու մասին օրենքի նախագիծը։ Նրանք հայտարարել են, որ հայտնի եռակողմ հայտարարությունից հետո երկրի առաջ ծառացած ծանրագույն խնդիրները լուծելու փոխարեն իշխանությունը զբաղված է բուհերին ինքնավարությունից զրկելով։ 

Հայաստանում գրանցվել է  կորոնավիրուսով վարակվելու 1184 նոր դեպք, վարակվածների ընդհանուր թիվը հասել է 139692-ի: Մեկ օրում մահացել է 28 վարակված, որոնցից 5-ի մահը վրա է հասել այլ հիվանդության պատճառով։ Մահացածների ընդհանուր թիվը 2860 է:

Սոցհարթակում ծաղրի առարկա է դարձել վարչապետի աշխատակազմում թափուր պաշտոնի համար հայտարարված մրցույթը: Կառավարության պաշտոնական կայքում տեղադրված տեքստում ներկայացված են մրցույթի հաղթահարման պայմանները․ կադրերի և անձնակազմի կառավարման վարչությունում 256 հազար դրամ աշխատավարձով քաղծառայողի աշխատանքին հավակնելու համար հայցորդը պետք է ճիշտ հերթականությամբ դասավորի շաբաթվա օրերը։

ԱՄՆ դոլարի փոխարժեքը նախորդ օրվա համեմատ աճել է 1.25 դրամով ու կազմել  511.25 դրամ: Եվրոյի փոխարժեքն աճել է 4.53 դրամով ու հասել  622.14 դրամի, բրիտանական ֆունտի փոխարժեքն աճել է 5.77 դրամով ու հասել 689.17 դրամի, իսկ ռուսական ռուբլու փոխարժեքն աճել է 0.09 դրամով ու կազմել 6.88 դրամ:

Դեկտեմբերի  5-ի ցերեկը Հայաստանի  առանձին շրջաններում սպասվում են տեղումներ, նաեւ մառախուղ։ Օդի ջերմաստիճանը դեկտեմբերի 5-7-ն աստիճանաբար կնվազի 4-5 աստիճանով։ Երեւանում տեղումներ սպասվում են գիշերը․ այս գիշեր մայրաքաղաքում կլինի 0-ից +2, վաղը ցերեկը 5-7 աստիճան զրոյից բարձր։

Տպել
Կարդացեք նաև
Ամբողջը
Ինչպե՞ս են հայերը Սպահանում դիմավորել Ամանորը
Իրանահայ համայնքը Իրանի ազգային փոքրամասնություններից ամենախոշորն է․․․
Լուրեր Հայաստանից ու աշխարհից «մեկ տողով»․ 28․05․2021
Առաջին անգամ Հանրապետության տոնին գլխավոր հանդիսավայրը փակ է եղել լրագրողների եւ քաղաքացիների համար…
Լուրեր Հայաստանից ու աշխարհից «մեկ տողով»․ 28․05․2021
Այսօր առավոտյան հերթական անգամ հայ հանրությունը փոթորկվեց սահմանից ստացված լուրից: Գեղարքունիքի սահմանային գոտում...
Լուրեր Հայաստանից ու աշխարհից «մեկ տողով»․ 26․05․2021
Սյունիքում երեկ հերթական բախումն է տեղի ունեցել հայ զինծառայողների եւ Հայաստանի տարածք ներխուժած ադրբեջանցի զինվորականների միջեւ...
Լուրեր Հայաստանից ու աշխարհից «մեկ տողով»․ 25․05․2021
Երեկվանից սկսած Հայկական զինուժը երեք կորուստ ունի, որոնցից մեկը՝ մարտական...
Լուրեր Հայաստանից ու աշխարհից «մեկ տողով»․ 24․05․2021
Վերջին օրերին լուրեր էին շրջանառվում, որ 44-օրյա պատերազմի օրերին Ջրականից նահանջելիս 160 հայ զինվոր անցել...
Ամենաշատ