«Լուսավոր Հայաստան» խորհրդարանական խմբակցությունը Լեռնային Ղարաբաղում ռազմական գործողությունների դադարեցման մասին եռակողմ հայտարարությունից հրաժարվելու դեպքում նոր պատերազմ սկսվելու վտանգ է տեսնում: Այս մասին դեկտեմբերի 7-ին Ազգային ժողովում «Լուսավոր Հայաստան» կուսակցության նախաձեռնած «Ստեղծված իրավիճակից դուրս գալու գործողությունների ծրագրի որոշման մասին» հայտարարության նախագծի քննարկման ժամանակ ասաց «Լուսավոր Հայաստան» կուսակցության եւ խորհրդարանական խմբակցության ղեկավար Էդմոն Մարուքյանը:
«Մենք ի սկզբանե ընդունել ենք, որ ստորագրված հայտարարությունն արդեն իրողություն է, այն իրականացվում է, բայց կատարվում է ադրբեջանական կողմի օգտին: Մենք պետք է բանակցություններ վարենք: Իսկ փաստաթղթի դենոնսացիան հղի է նոր պատերազմով: Կարծում եմ, որ մենք չպետք է գնանք այս ճանապարհով, բայց բանակցությունների միջոցով այս փաստաթուղթը շատ առումներով կարելի է օգտագործել նաեւ մեր օգտին»,- ասաց Մարուքյանը:
