Վերջին մեկ տարում Ռուսաստանի իշխանությունների հետ ինֆորմացիայի փոխանակման խզում է տեղի ունեցել: Այս մասին խորհրդարանական լսումների ժամանակ հայտարարեց «Լուսավոր Հայաստան» կուսակցության եւ խմբակցության ղեկավար Էդմոն Մարուքյանը:
Նրա խոսքով՝ պետք է մաքսիմալ սեղմ ժամկետում վերականգնել Ռուսաստանի հետ լիարժեք համագործակցությունը: «Բացի այդ, պետք է որքան հնարավոր է արագ ավարտին հասցնել զոհվածների մարմինների եւ գերիների փոխանակումը: Իշխանությունների կողմից մեծ բացթողում է այն, որ նոյեմբերի 9-ի հայտարարության մեջ չեն նշել վերջնաժամկետները: Այսպես, այսօր ադրբեջանցի զինվորականներին, որոնք մասնակցում են սահմանների դեմարկացիային, դիմավորում են սահմանամերձ գյուղերի ղեկավարները, այն դեպքում, երբ դա պետք է անեին կենտրոնական իշխանության համապատասխան գերատեսչությունների ներկայացուցիչները»,-հավելեց Մարուքյանը:
Միեւնույն ժամանակ, նա նշեց, որ անհրաժեշտ է ակտիվացնել ԼՂՀ պետական մարմինների հետ աշխատանքը: «Այլապես ստացվում է, որ այնտեղ տեղի ունեցող իրադարձությունների մասին, օրինակ՝ Ստեփանակերտում հասարակական տրանսպորտի վերականգնում, Երեւանում տեղեկանում են ռուսական խաղաղապահ կոնտինգենտից»,-եզրափակեց պատգամավորը: