Հռոմի պապ Ֆրանցիսկոսը հայտարարել է հատուկ Սուրբ Հովսեփի Տարի անցկացնելու մասին, որը կսկսվի երեքշաբթի, երբ Հռոմի Կաթոլիկ եկեղեցին նշում է Սուրբ Մարիամ Աստվածածնի Անարատ հղիության տոնը, եւ կավարտվի 2021 թվականի դեկտեմբերի 8-ին:
Պոնտիֆիկոսն այսպիսի որոշում է ընդունել՝ կապված Հռոմի Պիոս IX պապի ստորագրած դեկրետի 150-ամյակի հետ, որի համաձայն Սուրբ Հովսեփը հայտարարվել էր Կաթոլիկ եկեղեցու հովանավոր: Այս մասին հաղորդվում է Սուրբ Հովսեփի Տարվա առիթով հավատացյալներին հատուկ ընդունելություն տրամադրելու մասին դեկրետում, որը երեքշաբթի հրապարակել է Առաքելական Գերագույն տրիբունալը (Սուրբ գահի երեք տրիբունալներից մեկը):
Այս կապակցությամբ Ֆրանցիսկոս պապը հավատացյալներին է ուղարկել Patris Corde («Հոր սրտով») առաքելական ուղերձը, որի տեքստը երեքշաբթի հրապարակել է Սուրբ գահը: Այս փաստաթղթում պապը նշել է Հովսեփի հատուկ դերը, որն ավետարանական պատմության մեջ Աստվածամոր ամուսինն է: Նա շեշտել է, որ Հովսեփը Հիսուսին սիրում էր «հոր սրտով», եւ ուշադրություն է դարձրել այն հանգամանքին, որ բոլոր չորս Ավետարանների հեղինակները Հիսուսին անվանում են «Հովսեփի որդի»:
Ֆրանցիսկոս պապը միաժամանակ նշել է, որ բացի Կույս Մարիամից, ոչ մի այլ սուրբ Առաքելական գահում իր նախորդների կողմից այդպիսի ուշադրություն չի գրավել: Այսպես՝ Հռոմի Պիոս IX պապը նրան հռչակել է Կաթոլիկ եկեղեցու հովանավոր, Պիոս XII-ը նրան ճանաչել է աշխատավորների խնամակալ, իսկ Հովհաննես Պողոս II-ը անվանել է «Փրկչի պահապան»: Ֆրանցիսկոս պապը նաեւ հիշեցրել է, որ ժողովրդի մեջ Սուրբ Հովսեփին համարում են «բարի մահվան հովանավորը»:
