Ադրբեջանի հետ պատերազմից հետո Արցախի վերահսկողության տակ է մնում է 6 հէկ՝ Սարսանգի, Թրղիի 1,2,3,4, ինչպես նաեւ Գետավանի: Ընդհանուր դրվածքային (գումարային) հզորությունը 74,7 ՄՎտ է: Սակայն այս պահին փոքր հէկերը աշխատում են ոչ լրիվ հզորությամբ՝ ջրի սակավության պատճառով:
Այս մասին, NEWS.am-ի գրավոր հարցմանն ի պատասխան, հայտնել են Արցախի էկոնոմիկայի եւ արդյունաբերական ենթակառուցվածքների նախարարության մամուլի ծառայությունից։ «Ներկայում իրականացվում է էլեկտրաէներգիայի սպառման ծավալների վերագնահատում: Այժմ կատարվում են Տեղ գյուղից Քաշաթաղի շրջանով դեպի Ստեփանակերտ օդային գծերի վերականգնման աշխատանքներ՝ էլեկտրաէներգիայի պահանջարկի բավարարման համար:
Պատերազմի հետեւանքով տուժել են տնտեսության բոլոր ոլորտները՝ սկսած արդյունաբերությունից մինչեւ արտադրական ենթակառուցվածքներ, իսկ ամենաշատը՝ հիդրոէլոկտրակայաններն ու մշակող արդյունաբերության արտադրամասերը»,- նշվում է նախարարության պատասխանում:
