Եվրամիությունը պատժամիջոցներ կկիրառի ավելի շատ թուրք ֆիզիկական անձանց եւ ընկերությունների դեմ, որոնք պատասխանատու են Միջերկրական ծովի վիճահարույց ջրերում հորատման համար, ասվում է հայտարարության նախագծում, որը պատրաստվել է դեկտեմբերի 10-ին կայանալիք գագաթաժողովում ԵՄ առաջնորդների համաձայնեցման համար:
Եթե այս միջոցը համաձայնեցվի, ԵՄ-ն «լրացուցիչ ցուցակներ կպատրաստի»՝ հիմնվելով 2019 թվականից գոյություն ունեցող պատժամիջոցների ցուցակի վրա, եւ անհրաժեշտության դեպքում «կաշխատի դրա շրջանակն ընդլայնելու ուղղությամբ», ասվում է Reuters-ին հասանելի հայտարարության նախագծում: Նման պատժամիջոցները ԵՄ երկրների ղեկավարների համար առավել հասանելի պահպանողական միջոցներ են, որոնք հոկտեմբերին խոստացել էին օգտագործել «բոլոր գործիքները»՝ ճնշելու Թուրքիային, որպեսզի դադարեցնի Կիպրոսի եւ Հունաստանի ափերին ածխաջրածինների որոնումը:
Ֆրանսիան հայտարարել է, որ սատարում է Թուրքիայի տնտեսության դեմ «ոլորտային» պատժամիջոցներին: Բայց նման միջոցառումները Գերմանիան, Իսպանիան եւ Իտալիան համարում են չափազանց մեծ քայլ, որը Թուրքիային կդնի Ռուսաստանի հետ նույն ճամբարում:
Դիվանագետների կարծիքով՝ Թուրքիայի՝ որպես սիրիացի միգրանտներ ընդունող երկրի դերը սահմանափակում է Անկարային պատժելու Եվրոպայի ախորժակը: Հայտարարության նախագիծը նաեւ ուղղված է պատասխան գործողությունների հետաձգմանը: Եվրահանձնաժողովը եւ ԵՄ գլխավոր դիվանագետ Ժոսեպ Բորելը մինչեւ մարտին կայանալիք ԵՄ հաջորդ գագաթաժողով պետք է պատրաստեն «հետագա գործողությունների տարբերակներ»: «ԵՄ-ն կձգտի համակարգել այդ հարցերը ԱՄՆ-ի հետ»,- ասվում է նախագծում, ինչը, ըստ դիվանագետների, պայմանավորված է հունվարին ԱՄՆ նորընտիր նախագահ Ջո Բայդենի պաշտոնը ստանձնելուց հետո Վաշինգտոնի հետ արտաքին քաղաքական կապերի սերտացման հույսով:
Երկու էջանոց հայտարարության շուրջ բանակցությունները դեռ շարունակվում են: Հունաստանը եւ Կիպրոսը կարծում են, որ այդ պատժամիջոցները բավարար չեն: «Մենք կցանկանայինք նպատակային ոլորտային միջոցառումների նախապատրաստում տեսնել ավելի ուշ փուլում՝ փետրվարին կամ մարտին, եթե Թուրքիայի պահվածքը չփոխվի»,- ասել է կիպրացի դիվանագետը:
