Արեւմտյան երկրները չեն դադարեցնի Ռուսաստանի բարենպաստ փոխգործակցությունն այլ պետությունների հետ խոչընդոտելու փորձերը: Այս մասին հայտարարել է Ռուսաստանի արտաքին գործերի նախարար Սերգեյ Լավրովը՝ Արտաքին եւ պաշտպանական քաղաքականության խորհրդի վեհաժողովում, որը տեղի է ունեցել տեսակոնֆերանսի ռեժիմով, հայտնում է ՏԱՍՍ-ը:
«Այժմ մեզ համար պարզ է, որ Արեւմուտքի նպատակն է հնարավորություն չտալ ձեւավորել արտաքին բարենպաստ պայմաններ՝ Ռուսաստանի ներքին զարգացման համար»,- ասել է նա: «Գոնե այն ամենը, ինչ արվում է Ռուսաստանին զսպելու համար, հետապնդում է նման նպատակ: Հավանաբար, Ռուսաստանի զարգացմանը նպաստող արտաքին հնարավորությունները ոչնչացնելու փորձերը կշարունակվեն»:
Միեւնույն ժամանակ, ըստ Լավրովի, «Արեւմուտքը դեռ ամեն ինչ չէ»: «Համոզված եմ, որ այժմ ինտեգրվելու տեղ չկա, եթե ընդունենք զարգացման արեւմտյան մոդելները: Կորոնավիրուսը, իմ կարծիքով, համոզիչ կերպով ցույց տվեց, որ պետք է ինչ-որ բան ինքնուրույն կառուցել: Սա շատ հավակնոտ եւ բարդ խնդիր է, բայց շատ հրատապ»,- ասել է նախարարը:
Ռուսաստանի արտգործնախարարը նաեւ ասել է, որ աշխարհի շատ երկրներ պաշտպանում են մշակութային եւ քաղաքակրթական բազմազանությունը հարգելու, ինչպես նաեւ զարգացման տարբեր մոդելներ ճանաչելու Մոսկվայի մոտեցումը, ինչը ցույց է տալիս Ռուսաստանը որպես մեկուսացված պետություն ներկայացնելու Արեւմուտքի անկարողությունը:
«Մենք տեսնում ենք, թե ինչ առաընթաց է ապրում մեր դիրքորոշումը՝ ինչպես BRICS-ի, այնպես էլ ՇՀԿ-ի, ՀԱՊԿ-ի եւ ԱՊՀ-ի շրջանակներում: Կա Եվրասիական տնտեսական միություն, որն ակտիվորեն աշխատում է իր ծրագրերը համատեղել «Մեկ գոտի - մեկ ճանապարհ» չինական նախաձեռնության հետ»,- հավելել է նախարարը: Նա որպես օրինակ է բերել G20-ի աճող դերը, որի շատ երկրներ պաշտպանում են ռուսական մոտեցումները:
«Խաղաղության խնդիրները պետք է համարվեն ապագաղափարականացված, հավասար հիմունքներով: Եւ նույն հունով է ընթանում, ի դեպ, նախագահ Պուտինի նախաձեռնությունը՝ Մեծ Եվրասիական գործընկերություն ձեւավորելու մասին»,- եզրափակել է Ռուսաստանի արտգործնախարարը: