Ռուսաստանի կողմից Եվրոպական բանջարեղենի ներմուծման արգելքը լրացուցիչ հնարավորություններ է ստեղծում հայկական գյուղատնտեսության եւ արտահանողների համար: Այդ մասին NEWS.am-ին ասաց «Սպայկա» ընկերության գլխավոր տնօրենի տեղակալ Կարեն Բաղդասարյանը:
Նրա խոսքով` Ռուսաստանը ներմուծում է իրեն անհրաժեշտ բանջարեղենի 5-10 տոկոսը, ու այդ բացը ներկայումս պետք է լրացվի: Քանի որ Ռուսաստանի սահմանած արգելքը մեր տարածաշրջանի վրա չի տարածվում` «Սպայկա» ընկերությունը հնարավորություն է տեսնում ռուսական շուկա մուտք գործելու համար: Բաց գրունտի բանջարաղենից` դա առաջին հերթին կարտոֆիլն է եւ կաղամբը: Ինչ վերաբերում է լոլիկին եւ վարունգին, ապա Կ. Բաղդասարյանի խոսքով` դրա արտադրությունը առայժմ բավարար է միայն ներքին շուկայի կարիքների համար, սակայն ռուսական արգելքը կարող է խթանել ջերմոցային տնտեսությունների գործունեությունը: Մասնավորապես` ընկերությունը հիմնել է 6 հա ջերմոցային տնտեսություն, որի արտադրանքը կարտահանվի:
Նշենք, որ Ռուսաստանը հունիսի 2-ից ամբողջությամ արգելել է Եվրամիությունից բանջարեղենի ներմուծումը: Ռուսաստանի գլխավոր սանիտարական բժիշկ Գենադի Անիշչենկոն արդեն հայտնել է այն պայմանները, որի դեպքում այդ արգելքը կվերացվի: Առաջին հերթին` Եվրոպան պետք է հաստատի վարակի հարուցիչը եւ տարածման պատճառները, վարակի փոխանցման միջոցները (ջուր, օդ, սնունդ), վարակի օջախները:
Որոշ երկրներ, այդ թվում` Թուրքիան եւ Ադրբեջանը մտադիր են առաջիկայում ավելացնել դեպի Ռուսաստան բանջարեղենի արտահանումը: