ԱՄՆ պետքարտուղար Մայք Պոմպեոն իրազեկում է ստորագրել Սուդանին ահաբեկչության հովանավոր երկրների ցուցակից հանելու մասին, որոշումն ուժի մեջ է մտնում դեկտեմբերի 14-ից, իր ֆեյսբուքյան էջում հայտնում է Խարտումում ամերիկյան դեսպանատունը, փոխանցում է «ՌԻԱ Նովոստի»-ն:
«Կոնգրեսին իրազեկման 45-օրյա ժամկետը լրացել է, ու պետքարտուղարն իրազեկում է ստորագրել այն մասին, որ Սուդանի որպես ահաբեկչության հովանավոր երկրի կարգավիճակի դադարեցումն ուժի մեջ է մտնում այսօրվանից (դեկտեմբերի 14-ից), այն հրապարակվելու է դաշնային ռեեստրում»,- նշված է դեսպանատան հաղորդագրության մեջ:
ԱՄՆ նախագահ Դոնալդ Թրամփն ավելի վաղ Կոնգրեսին հայտնել էր, որ ԱՄՆ գործադիր իշխանության տեսակետով Սուդանն այլեւս չի համարվում ահաբեկչության հովանավոր պետություն: Պայմանավորվածությունը ձեռք էր բերվել ԱՄՆ-ում ահաբեկչության զոհերին 335 մլն դոլար վճարելու Սուդանի համաձայնության դիմաց:
ԱՄՆ-ն Սուդանը ահաբեկչության հովանավոր պետությունների ցուցակի մեջ էր մտցրել 1993 թվականի օգոստոսի 12-ին, իսկ 1997 թվականին Խարտումի դեմ պատժամիջոցներ էր սահմանել, որոնք, մասնավորապես, սահմանափակում էին օտարերկրյա գործընկերների հետ սուդանյան բանկերի աշխատելու հնարավորությունը:
