ՆԱՏՕ-ի անդամ երկրները քննադատության են ենթարկել Միջուկային զենքի արգելքի մասին միջազգային պայմանագիրը, որն ընդունվել էր 2017 թվականին եւ պետք է ուժի մեջ մտներ 2021 թվականի հունվարի 22-ին: Այդ փաստաթուղթը «չի արտացոլում անվտանգության շուրջ իրավիճակը, որը դառնում է էլ ավելի բարդ», ասված է ՆԱՏՕ-ի Խորհրդի հայտարարության մեջ:
ՆԱՏՕ-ն նշում է, որ նոր պայմանագիրը չի ստորագրել եւ ոչ մի պետություն, որն ունի միջուկային զենք, եւ որ այն «չի համապատասխանում միջուկային զենքը չտարածելու եւ զինաթափման գոյություն ունեցող ճարտարապետությանը»: Բացի այդ, փաստաթղթում բացակայում են դրա պահպանումը ստուգելու «հստակ մեխանիզմները», հաղորդում է DW-ը:
Միեւնույն ժամանակ միությունը հաստատում է Միջուկային զենքի չտարածման մասին պայմանագրի նկատմամբ իր հակվածությունը, որը գործում է 1970 թվականից 190 երկրների մասնակցությամբ, եւ համարում է այն «միակ հուսալի ուղին միջուկային զինաթափման համար»: ՆԱՏՕ-ն նաեւ հաստատում է հակվածությունը միջուկային զենքի, զինաթափման եւ չտարածման պահպանման եւ դրա հսկողության ջանքերի նկատմամբ եւ «շարունակում հետապնդել վերջնական նպատակը՝ աշխարհն առանց միջուկային զենքի»:
Միջուկային զենքն արգելելու մասին պայմանագիրը միջազգային համաձայնագիր է, որն արգելում է այդ տիպի զինամթերքի ստեղծումը, փորձարկումը, պահպանումը, ձեռքբերումը, տեղափոխումն ու օգտագործումը: Փաստաթուղթն ընդունվել էր 2017 թվականի հուլիսին 122 պետությունների աջակցությամբ: Աշխարհի մի շարք երկրներ, այդ թվում՝ բոլոր միջուկային գերտերություններն եւ ՆԱՏՕ-ի անդամ պետությունները, ներառյալ՝ Գերմանիան, բոյկոտի են ենթարկում պայմանագիրը, այն կրում է, ըստ ամենայնի, խորհրդանշական բնույթ, նշում է dpa գործակալությունը: Ընդ որում՝ ԱՄՆ-ը Ռուսաստանը, Ֆրանսիան, Մեծ Բրիտանիան եւ Չինաստանը պնդում են, որ իրենց միջուկային արսենալը կրում է բացառապես զսպող բնույթ, եւ ընդգծում, որ նրանք ընդունել են Միջուկային զենքը չտարածելու մասին պայմանագրի դրույթները: Սակայն պայմանագիրը ստորագրած երկրների ցանկում չեն Հնդկաստանը, Պակիստանն ու Իսրայելը, որոնք փաստացի նույնպես ունեն միջուկային զենք: Հյուսիսային Կորեան, որը ենթադրաբար ունի միջուկային մարտագլխիկներ, 2003 թվականին դուրս է եկել Միջուկային զենքը չտարածելու մասին պայմանագրից: