ՌԴ նախագահ Վլադիմիր Պուտինը պատմել է, որ իր մամուլի խոսնակ Դմիտրի Պեսկովը նախօրեին իրեն զեկուցել է Ալեքսեյ Նավալնու «թունավորման» հետ կապված «վերջին հնարումների» մասին, հաղորդում է ՌԻԱ Նովոստին:
Երկուշաբթի հրապարակվել է The Insider-ի, Bellingcat-ի եւ CNN-ի համատեղ հետաքննությունը Der Spiegel-ի մասնակցությամբ, որում մեջբերվում են ԱԴԾ աշխատակիցների անուններ եւ լուսանկարներ, որոնք, իբր, կապ ունեն Նավալնու թունավորման հետ: Մամուլի ասուլիսի ժամանակ Պուտինին հարց են ուղղել, թե արդյոք նա տեսել է այդ հրապարակումները:
«Ինչ վերաբերում է Բեռլինի կլինիկայի պացիենտին, ես արդեն բազմիցս խոսել եմ այդ մասին, կարող եմ միայն որոշ բաներ կրկնել»,-պատասխանել է Պուտինը:
«Ես գիտեմ, Պեսկովը երեկ զեկուցել է այդ առումով որոշ հնարումների մասին, մեր հատուկ ծառայությունների տվյալների առնչությամբ եւ այլն»,-հավելել է նա:
«Թունավորման հետաքննության» հեղինակները Bellingcat-ի աշխատակիցներն են: Այդ ռեսուրսը բազմիցս հակառուսական նյութեր է հրապարակել, մասնավորապես, Դոնբասում MH17 մալայզիական չվերթի աղետի եւ «Սկիրպալների գործով», որոնցում պնդումները բազմիցս հերքել են ռուս պաշտոնյաները:
CNN-ը, Spiegel-ը եւ Նավալնին իրենց տարբերակն են առաջ տանում՝ հիմնվելով ավիատոմսերի եւ հեռախոսային հաշիվների վրա, որոնք օրինական կերպով ստանալ կամ ստուգել անհնար է: Նավալնին նաեւ պնդում է, որ ռուս բժիշկները, որոնք իրեն օգնություն են ցուցաբերել, ախտորոշման հետ կապված կեղծ հայտարարություններ են արել Օմսկում իր հոսպիտալացման ժամանակ:
Ընդ որում, «հետաքննության» հեղինակները խոստովանում են, որ որեւէ տվյալ չկա այն մասին, որ նշված «ԱԴԾ աշխատակիցներից» որեւէ մեկը եղել է Օմսկում Նավալնու հոսպիտալացման ժամանակ՝ այդպիսով հերքելով ավելի վաղ բրիտանական Sunday Times-ի հրապարակած վարկածը «թունավորման» կրկնակի փորձի մասին:
