Ադրբեջանից գյուղատնտեսական մթերքի արգելքը քաղաքականացված բնույթ չի կրում, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Ինչ-որ քաղաքական ենթատեքստ չկա: Ռոսսելխոզնադզորի կողմից պարբերաբար արգելվում է տարբեր երկրներից գյուղատնտեսական մթերքների ներմուծումը: Դա ստանդարտ ֆիտոսանիտարական ընթացակարգ է, որն ուղղված է Ռուսաստանի եւ ԵԱՏՄ անդամ պետությունների տարածքում կարանտինային օբյեկտների տարածումը կանխարգելելուն, որոնք ունակ են զգալի վնաս հասցնել գյուղատնտեսությանն ու ստեղծել ռիսկեր պարենային անվտանգության համար»,-ասվում է Զախարովային հայտարարության մեջ, որը հրապարակվել է ՌԴ ԱԳՆ կայքում:
Ինչպես նշել է դիվանագետը, ադրբեջանից խնձոր եւ լոլիկ ներմուծելու արգելքի մասին հարցը վաղուց բարձրաձայնվել է Ռուսաստանում, քանի որ Ռոսսելխոզնադզորը բազմիցս հայտնաբերել է հարավամերիկյան ցեց ադրբեջանական լոլիկում: Նա նաեւ հիշեցրել է, որ այդպիսի սահմանափակումներ են ընդունվել նաեւ Թուրքիայից մթերքների դեմ: Զախարովայի խոսքով՝ այսօր ներկրման թույլտվություն է ստացել Ադրբեջանից արդեն հինգ ձեռնարկություն, ինչպես նաեւ պահպանվել է մատակարարումն այն շրջաններից, որտեղ ավելի վաղ հայտնաբերվել էին կարանտինային օբյեկտներ, որոնք ԵԱՏՄ-ում գործող սահմանափակումներից են:
