Եվրոպայում, Բելգիայում եւ Բավարիայում իրավապահ մարմինների համագործակցության շնորհիվ, եվրոպական նարկոկարտել է ջախջախվել, որը զբաղվում էր Հարավային Ամերիկայից Գերմանիա կոկաինի մատակարարմամբ: Անցյալ շաբաթ Բելգիայի ոստիկանությունը Անտվերպենում եւ Բրյուսելում 17 կասկածյալի էր բերման ենթարկել, հայտնում է DW-ն:
Բերման ենթարկվածների թվում են Ալբանիայի 34-ամյա եւ Լատվիայի 35-ամյա քաղաքացիները, ովքեր, ըստ հետաքննության, ոչ միայն ղեկավարել են համաեվրոպական հանցավոր խմբավորումը, այլեւ որպես կապող օղակ են ծառայել հարավամերիկյան նարկոկարտելների եւ կոկաինի գնորդների միջեւ Եվրոպայում: Դեկտեմբերի 15-ին եւ 16-ին ոստիկանության լայնածավալ օպերացիայի ընթացքում նաեւ մի քանի հարյուր հազար եվրո եւ 187 կիլոգրամ կոկաին է առգրավվել:
Հետաքննությունը սկսվել էր 2017-ին Բավարիայի տասը սուպերմարկետներում գրեթե 200 կիլոգրամ կոկաինի հայտնաբերումից հետո: Այդ ժամանակ ոստիկանությունը թմրանյութը հայտնաբերել էր բանանի արկղերում: Քննության ընթացքում պարզվել էր, որ հանցագործները Էկվադորից Գերմանիա ծովային ճանապարհով կոկային են տեղափոխել բանանի արկղերի մեջ: Համբուրգի նավահանգստից բեռը բեռնատարներով տեղափոխվել էր ջերմոցներ` հասունանալու համար: Հանցագործները ներխուժում էին այնտեղ եւ վերցնում էին կոկաինը բանանի արկղերի միջից: 2018-ին այս գործով 18 մարդ էր դատապարտվել: