Իրանի նախագահ Հասան Ռոհանին պատժամիջոցների ճնշման պայմաններում Եվրասիական տնտեսական միության հետ ավելի սերտ փոխգործակցության կոչ է արել, հաղորդում է Tasnim-ը:
Նրա խոսքով՝ վերջին մեկ տարում ԵԱՏՄ-ի հետ առեւտրային փոխանակման մասին տվյալները ցույց են տալիս, որ ԵԱՏՄ-ի հետ համագործակցությունը իրանական արտադրանքի արտահանման համար դեպի նոր շուկա դռներ է բացել: «ԵԱՏՄ-ում Իրանի ներկայությունն ավելի կարեւոր է, քան նախկինում, ներկայիս տնտեսական պատերազմի եւ կորոնավիրուսի հետեւանքների պայմաններում»,-ընդգծել է Ռոհանին:
2019 թվականի հունիսին իրանական խորհրդարանը վավերացրել է համաձայնագիրը, որը թույլ է տալիս միանալ ԵԱՏՄ երկրների հետ ազատ առեւտրի գոտուն:
Համաձայնագիրը, որը ստորագրվել է Ղազախստանում 2018 թվականի մայիսին, սահմանում է ԵԱՏՄ-ի, Իրանի եւ Առեւտրի համաշխարհային կազմակերպության միջեւ հիմնական կանոնները:
