Նիկոլ Փաշինյանի հիմնական վախն այն է, որ չի հրաժարվում աթոռից, որովհետեւ գիտի, որ եթե բացահայտվի իր դավաճանության ամբողջ տարածությունը, կամ գետինը պետք է մտնի, եթե այդքան ուժ ունենա, կամ պետք է իմանա, որ մեր ազգի դավաճանները նրա համեմատ դավաճանիկներ կլինեն։ Այս մասին այսօր՝ դեկտեմբերի 22-ին Հանրապետության հրապարակում հայտարարեց ԱԺ նախկին պատգամավոր Ռուբիկ Հակոբյանը։
«Ինձ համար նախընտրելի է նրան դահիճ ասել։ Դահիճ, ով գլխատեց կայացած Արցախ պետությունը, դահիճ, ով գլխատեց 5000 զինվորի, ով առանց շիրիմների է թողնելու մի քանի տասնյակ, գուցե հարյուրից ավելի զինվորների»,- ասաց նա։
Դիմելով «Իմ քայլը» խմբակցությանը, Ռուբիկ Հակոբյանն ասաց, որ Նիկոլ Փաշինյանը նախ դավաճանել է հենց նրանց։
«Ինքը ձեզ դավաճանեց, երբ Դուշանբեի վերելակում խնդրեց, որ Ալիեւը իրեն օգնի, որպեսզի ինքն ամրապնդի իր իշխանությունն այստեղ։ Ալիեւը համաձայնեց ու ասաց, որ այդ դեպքում պետք է դու հրաժարվես մեր դիվանագիտական հիմնական առավելությունից՝ Սանկտ Պետերբուրգի եւ Վիեննայի փաստաթղթերից։ Նա մի շատ կարեւոր հարց է դրել, ասել է, որ դու պետք է ժողովրդի մոտ ինձ ներկայացնես որպես քաղաքակիրթ, կառուցողական անձնավորություն, դա նա արեց։ Մեր 30-ամյա պատմության մեջ չի եղել մի դեպք, երբ որեւէ իշխանություն դիմի Ադրբեջանի իշխանությանը, որպեսզի օգնի այստեղ իշխանություն ամրապնդել։ «Իմ քայլի» պատգմավորներ նա դավաճանեց ձեզ, երբ ոտքերը սրբեց Սահմանադրության եւ ՍԴ-ի վրա՝ իր վրեժխնդրության պատճառով։ Նա գողացավ ձեր քաղաքական անձնագիրը, ստորագրությունը, եւ ձեր դեմ օգտագործեց»,- ասաց Հակոբյանը։
Ըստ Ռուբիկ Հակոբյանի՝ ավելի դաժան պարտություն է սկսվել նոյեմբերի 9-ից հետո, երբ պարտվեց մեր արժանապատվությունն ու մեր հավաքական կերպարը։
«Ես ուզում եմ հրաժարվել քաղաքկան էդ պոեզիայից, որ մեր ժողովուրդը չի պարտվել, այլ ինքն է պարտվել։ Ոչ, մենք բոլորս ենք պարտվել։ Սա ինչո՞ւ եմ ասում, որովհետեւ եթե չգիտակցենք, որ բոլորս ենք այս հրեշին ծնել եւ նվիրել Ալիեւին, որն օգտագործեց մեր դեմ, մենք վաղը Նիկոլիից մի նոր ռակիրովկա կտեսնենք, ես իհարկե, դա տեսնում եմ Ազգային ժողովում, ես հասկանում եմ, որ այնտեղ արդեն քայլեր են տարվում, որպեսզի ռակիրովկա տարվի, բայց մենք պետք է պայմանավորվենք, որ դա թույլ չենք տալու»,- ընդգծեց ԱԺ նախկին պատգամավորը։