Պետությունը ընդհանուր առմամբ երեք բան պետք է ապահովի՝ անվտանգություն, արդարություն եւ ազատություն, եւ այդ երեք սյան վրա կարելի է կառուցել երկրի կայուն զարգացումը եւ երկրի քաղաքացիների արժանապատիվ կենսակերպն ու բարեկեցությունը: Այս մասին այսօր՝ դեկտեմբերի 23-ին, Հանրապետության հրապարակում ընդդիմության հանրահավաքի ժամանակ հայտարարեց «Ազգային օրակարգ» կուսակցության խորհրդի նախագահ Արա Հակոբյանը:
Նա հիշեցրեց, որ մենք ունեցանք խայտառակ պարտություն պատերազմում, Արցախի տարածքների 75 տոկոսի կորուստ, 5 հազար զոհ, տասնյակ հազարավոր վիրավորներ. «Մենք շարունակում ենք ունենալ կորուստներ արդեն ՀՀ տարածքում: Մենք չունենք անվտանգություն, մեր անվտանգությունը տապալված է: Դուք սա՞ էիք սպասում իշխանությունից:
Հաջորդը՝ ազատությունն է. ի՞նչ ազատության մասին է խոսքը, երբ մեկ տարի է գտնվում ենք տարբեր արտակարգ ու ռազմական դրությունների մեջ ու դա օգտագործում են մեզ ազատ տեղաշարժից, ազատ խոսքից զրկելու համար:
Եթե ռազմական դրությունը պահպանվում է, որ մենք պատերազմում հաղթանակ ունենայինք, ինչու ունեցանք կապիտուլյացիա: Սուտ է դա»,-հայտարարեց նա;
Արա Հակոբյանը հիշեցրեց, որ Նիկոլ Փաշինյանն իշխանության գալու ժամանակ ասում էր, որ արդարություն է լինելու, կոռուպցիան վերացնելու են, վերցնելու են երկրից գողացված փողերը. «Ասում են՝ 100 մլն դոլար փող են վերցրել կոռուպցիոն գործերից, բայց դրանից ավել իրենց պարգեւավճար են տվել: Եթե մարդկանց թոշակը 5-10 հազարով բարձրացնում են, իրենց աշխատավարձերը 3-4 անգամ են բարձրացրել: Դա՞ է արդարությունը: Իրենք հիմա էլ իրենց պարգեւավճարներ են տալիս, երբ մեր տղաները հիմա էլ գերեվարված են, թուրքի ձեռքի տակ են, սպանվում են, նորից են գերեվարվում»:
Նա հավելեց, որ Նիկոլ Փաշինյանն այնքան է վախեցած, որ միայն մեկ խնդիր է լուծում՝ հնարավորինս ավել մնալ այդ աթոռին. «Նա նույնիսկ եկեղեցի է թիկնապահներով մտնում: Նման բան ոչ ոք չի արել, նույնիսկ իր սիրած մոնղոլ-թաթարները: Որպեսզի մեր երկիրը ապագա ունենա, լինի անվտանգություն, ազատություն, արդարություն, մեկ նախապայման կա, Նիկոլ Փաշինյանն իր իշախանախմբով պետք է հեռանա կամ մենք հեռացնենք»:,-ասաց նա: