Իրաքում «Իսլամական պետություն» ահաբեկչական խմբավորման այսպես կոչված հոգեւոր առաջնորդի առաջին տեղակալը ոչնչացվել է երկրի հյուսիսում հատուկ գործողության արդյունքում: Այդ մասին հաղորդում է «Աս Սումարիա» հեռուստաալիքը՝ վկայակոչելով Իրաքի Զինված ուժերի հրամանատարության ներկայացուցիչ Յախյա Ռասուլին:
Նրա խոսքով՝ ուղղաթիռներով հատուկ տակտիկական ստորաբաժանումն իրականացրել է ռեյդ Վադի էշ Շայ շրջանում: «Գործողության ժամանակ հատուկջոկատայինները մարտի են բռնվել՝ սպանելու երկու մահապարտի,-ասել է Ռասուլը:-Ոչնչացված ծայրահեղականներից մեկն Իրաքի այսպես կոչված հոգեւոր առաջնորդի օգնականն է՝ Շաալյան կեղծանվամբ»,-հաղորդում է ՏԱՍՍ-ը:
ԻՊ-ի ահաբեկիչներն օկուպացրել են Իրաքի տարածության շուրջ մեկ երրորդ մասը 2014 թվականի ամռանը: Նույն տարվա հունիսին նրանք գրավել են երկրում մեծությամբ երկրորդ քաղաք Մոսուլը եւ հայտարարել այն՝ որպես այսպես կոչված խալիֆաթի մայրաքաղաք: 2015 թվականին միջազգային կոալիցիայի աջակցությամբ Իրաքի կառավարական ուժերը սկսել են լայնամասշտաբ արշավ ծայրահեղականների գրաված շրջաններն ազատագրելու համար: Իրաքում խմբավորման պարտությունից հետո, որի մասին իշխանությունները հայտարարել էին 2017 թվականի դեկտեմբերին, երկրում անվտանգության ոլորտում իրադրությունը զգալիորեն լավացել էր, իսկ հարձակումները, այդ թվում՝ ահաբեկչությունները եւ այլ հանցագործությունները՝ անկում ապրել:
Ընդ որում՝ ուժային կառույցները դեռեւս անցկացում են ահաբեկիչներին ոչնչացնելու գործողություններ երկրի տարբեր շրջաններում, որտեղ ահաբեկիչները դեռեւս իրականացնում են հարձակումներ իրավապահների, բանակի եւ խաղաղ բնակիչների վրա:
