Իրանը հերքում է Բաղդադում ամերիկյան դեսպանատան վրա հարձակման վերաբերյալ ԱՄՆ նախագահ Դոնալդ Թրամփի մեղադրանքնեը, դրանք համարում է չհիմնավորված, հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն, փոխանցում է «ՌԻԱ Նովոստի»-ն:
«Ինչպես արդեն բազմիցս հայտարարվել է, Իրանը մերժում է դիվանագիտական եւ բնակելի օբյեկտների վրա հարձակումները»,- հայտարարել է Խաթիբզադեն՝ մեղադրանքներն անվանելով «չհիմնավորված եւ կեղծ»:
Նա Թրամփին խորհուրդ է տվել խուսափել լարվածության մեծացումից, ինչպես նաեւ «Սպիտակ տանը իր վերջին օրերին արկածախնդրական եւ վտանգավոր գործողություններից»:
Անցած շաբաթվա վերջին Իրաքի մայրաքաղաք Բաղդադի «կանաչ գոտին», որտեղ տեղակայված են պետական հաստատություններ եւ օտարերկրյա դիվանագիտական առաքելություններ, այդ թվում՝ ԱՄՆ դեսպանատունը, ենթարկվել է հրթիռակոծության: Տեղական լրատվամիջւոցների տեղեկություններով՝ ամերիկյան դեսպանատան տարածքում տեղակայված ՀՕՊ համակարգերը հետ են մղել հրթիռային հարձակումը: Բաղդադում ԱՄՆ դեսպանությունը հայտնել է դիվանագիտական ներկայացուցչության տարածքում աննշան վնասվածքների մասին: ԱՄՆ պետքարտուղար Մայք Պոմպեոն Բաղադադի «կանաչ գոտու» վրա հարձակման մեջ մեղադրել է իրանամետ աշխարհազորին: Թեհրանը հերքել է դեսպանատան հրթիռակոծությանը հնարավոր մասնակցության վերաբերյալ հայտարարությունները: