Հայաստանը պետք է գլխավորի հայրենասեր եւ փորձառու անձնավորություն: Գիտեմ, որ մի շարք կուսակցություններ Վազգեն Մանուկյանին առաջադրել են որպես երկրի վարչապետի թեկնածու, ես վստահ եմ նրա հմտության եւ հայրենասիրության մեջ: Այս մասին Ռուսաստանի հայերի միության կողմից կազմակերպված քննարկման ժամանակ ասաց Ռուսաստանի Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը:
«Ես նրան վաղուց եմ ճանաչում: Նա երիտասարդ չէ, սակայն դա ոչ թե թերություն, այլ առավելություն է»,- նկատեց պատգամավորը:
Նրա խոսքով` նոր իշխանությունները, առաջին հերթին, պետք է միջոցներ ձեռնարկեն` ճգնաժամը դադարեցնելու, հասարակության վստահությունը իշխանությունների նկատմամբ վերականգնելու, արդար ընտրություններ անցկացնելու եւ քաղաքական էլիտան նորացնելու համար, քանի որ անհնար է երկիր զարգացնել այն մարդկանց հիմքով, ովքեր պարտություն են կրել:
«Սակայն դա չի նշանակում, որ նոր կառավարությունում չեն կարող Փաշինյանի կողմնակիցներ լինել: Մի բան կարող եմ ասել. պետության ղեկավարությունը չպետք է անցնի անփորձ մարդկանց: Միթե՞ Փաշինյանի դեպքը չի վկայում այն մասին, որ դա վտանգավոր է», - եզրափակեց Զատուլինը:
Հիշեցնենք, որ Վազգեն Մանուկյանն առաջադրվել է որպես Հայաստանի Հանրապետության վարչապետի թեկնածու Հայրենիքի փրկության շարժումից: