Հետպատերազմյան աջակցության ծրագրերի շրջանակներում ձեզ հետ անհատական աշխատանքի մոտեցում ենք ցուցաբերել։ Այդ աշխատանքը թույլ է տվել մեզ մշակել համակարգ, որով առանձնացրել ենք հաճախ կրկնվող դեպքեր եւ մշակել դրանց լուծումները։ Խնդիրները թե տեխնիկական են, թե բովանդակային, հետեւաբար մենք ինտենսիվ կերպով աշխատում ենք բոլոր ներգրավված գերատեսչությունների հետ։ Այս մասին գրել է Արցախի Հանրապետության աշխատանքի, սոցիալական եւ բնակարանային հարցերի նախարար Մանե Թանդիլյանը։
«Այսպիսով, որպեսզի կարողանանք ավելի օպերատիվ եւ համակարգված լուծում տալ ձեզ մոտ առաջացած բոլոր հարցերին, գործարկում ենք բողոք-դիմումների հավաքագրման համակարգ՝ յուրաքանչյուր ծրագրով։ Այս դիմումները առանձնացնելու ենք ըստ համապատասխան գերատեսչությունների, ճշգրտենք, եւ ձեզ տեղեկացնենք արդյունքի մասին՝ կարճ հաղորդագրության տեսքով։
Դիմում-բողոքները լրացնելու հետ կապված որեւէ խնդիր ունենալու դեպքում, մեր նախարարության աշխատակիցները պատրաստ են աջակցել ձեզ նույն ընթացակարգով, ինչպես աջակցել ենք հիմնական դիմումները լրացնելիս։
Սիրելի արցախցիներ, խնդրում եմ համագործակցել մեզ հետ՝ զինվելով հանդուրժողականությամբ եւ համբերատարությամբ, որպեսզի մենք էլ մեր հերթին երբեմն անհնարին թվացող հարցերին լուծումներ գտնենք, իսկ դա պահանջում է հետեւողական եւ ջանասեր աշխատանք, որն անձնվեր կերպով եւ ինտենսիվ ռեժիմով իրականացնում են մեր աշխատակիցները»,- գրել է նա։
Դիմում-բողոքներ ներկայացնելու համար անցեք հետեւյալ հղումով։
