Թուրքական պատմագիտական ընկերության նախկին նախագահ, Հայոց ցեղասպանությունը զավեշտալի պնդումներով ժխտող Յուսուֆ Հալաչօղլուն հերթական ծիծաղելի հայտարարությամբ է հանդես եկել:
Թուրքական Stargundem-ի փոխանցմամբ` «Ազգայնական շարժում» կուսակցության կողմից Կայսերի քաղաքում պատգամավորի թեկնածու առաջադրված տխրահռչակ Յուսուֆ Հալաչօղլուն Կայսերիում հանդիպել է մոտ 100 դասախոսների հետ, որի ընթացքում «պարզաբանել» է, թե ինչու են իրեն տարիներ առաջ աշխատանքից ազատել: «Սխալ է այն կարծիքը, որ ինձ ազատել են իմ այն ասածների համար, թե շատ դյոնմեն հայեր իրենց քուրդ ալեւիներ են ներկայացնում, իսկ քրդերը թուրքմենական ծագում ունեն: Ինձ աշխատանքից հանելու պատճառն այլ է:
Թուրքիան ԱՄՆ-ի եւ Հայաստանի հետ Շվեյցարիայում գաղտնի բանակցություններ էին վարում: Ինչպես դուք արդեն գիտեք, այդ բանակցությունների ընթացքում համաձայնություն կայացվեց սահմանների բացման հետ կապված փաստաթուղթ ստորագրել: Այդ ստորագրության արարողության ԱՄՆ-ի գլխավորությամբ մասնակցեցին մի շարք պետություններ: Այդ ժամանակ ԱՄՆ-ը եւ Հայաստանը պահանջեցին ինձ աշխատանքից ազատել, եւ ես ազատվեցի աշխատանքից»,-պնդել է Յուսուֆ Հալաչօղլուն:
