Հաջորդ տարվանից ԵՄ երկրներից պլաստիկ թափոնները կդադարեն ուղարկվել Տնտեսական համագործակցության եւ զարգացման կազմակերպության մեջ չմտնող երկրներ, հաղորդում է Europulse-ը:
Բացառություն կարվի միայն այն պլաստիկի համար, որը վնասակար չէ բնությանը եւ հարմար է վերամշակման համար: Ընդ որում, Եվրամիությունը կկարողանա այդպիսի պլաստիկի թափոններն ուղարկել միայն դրանք ընդունող երկրի պայմաններով:
Եվրահանձնաժողովի կողմից սահմանված նոր կանոններն ուժի մեջ կմտնեն 2021 թվականի հունվարի 1-ից:
Այս նոր կանոնների օգնությամբ ԵՄ-ն ակնկալում է նվազեցնել աղտոտումը պլաստիկից ոչ միայն իր տարածքում, այլեւ ամբողջ աշխարհում:
Նախկինում Եվրամիությունը վերամշակման համար պլաստիկն ուղարկում էր Թուրքիա, Մալազիա, Ինդոնեզիա, Վիետնամ, Հնդկաստան եւ Չինաստան:
ԵՄ-ն մտադիր է մինչեւ 2030 թվականը վերամշակել իր պլաստիկի 50 տոկոսը, իսկ ԵՄ ամբողջ պլաստիկ փաթեթավորումը մինչ այդ պետք է կամ հեշտությամբ վերամշակվող լինի, կամ բազմակի օգտագործման:
Կենցաղային պլաստիկն օվկիանոսի աղտոտման ամենատարածված աղբյուրն է: Ինչպես ցույց է տվել Գերմանիայից գիտնականների վերջերս կատարած հետազոտությունը, պլաստիկը կարող է ավելի քան 20 տարի պահպանվել նույնիսկ օվկիանոսի հատակին` գրեթե չքայքայվելով: