Microsoft ընկերությունը կարծում է, որ նախկինում ԱՄՆ-ի պետական գերատեսչությունների եւ բիզնեսի վրա հարձակված հաքերները հասանելիություն են ստացել իր ծրագրային ծածկագրի վերաբերյալ ներքին տեղեկատվությանը: Այս մասին նշված է ծրագրային ապահովման խոշոր արտադրող հանդիսացող այս ընկերության բլոգում հրապարակված հայտարարության մեջ, հայտնում է ՏԱՍՍ-ը:
Microsoft-ը ամերիկյան SolarWinds ընկերության հաճախորդներից մեկն է։ SolarWinds-ի համակարգերը հաքերները կոտրել էին այս տարվա սկզբին: Դեկտեմբերի 17-ին Microsoft-ի ներկայացուցիչները խոստովանել էին, որ SolarWinds-ի վնասակար ծածկագիրը հայտնաբերվել է իրենց էկոհամակարգում, այն մեկուսացրել եւ հեռացրել են»:
Այժմ Microsoft-ը պարզաբանել է, որ ընթացող հետաքննությունը «բացահայտել է անսովոր ակտիվություն՝ կապված փոքր թվով ներքին հաշիվների հետ»: Ընկերության մասնագետները հայտնել են, որ «մի հաշիվն օգտագործվել է մի շարք պահոցներում որեւէ ծածկագիր դիտելու համար»: «Այս հաշիվը չուներ որեւէ ծածկագիր կամ տեխնիկական համակարգ փոխելու թույլտվություն, հետաքննության ընթացքում պարզեցինք, որ փոփոխություններ չեն եղել»,- պարզաբանել են ընկերությունից:
Ինչպես հավաստիացրել են Microsoft-ում, հիմքեր չկան ենթադրելու, որ հաքերները հասանելիություն են ստացել իրենց արտադրանքը սպասարկելու համար ծառայություններին կամ հաճախորդների տվյալներին: Ընկերության մասնագետները նշում են, որ իր համակարգերը հաքերները չեն օգտագործել կիբեռհարձակումներ իրականացնելու համար: