2021 թվականի առաջին օրը Ստեփանակերտի Մոր եւ մանկան առողջության պահպանման կենտրոնում 5 երեխա է ծնվել. 3 տղա եւ 2 աղջիկ։
«Մինչ այսօր 2021 թվականի սկզբից ունեցել ենք 11 ծննդաբերություն եւ ներկա պահին սպասվում է 1 ծննդաբերություն»,- նշել է Մոր եւ մանկան առողջության պահպանման կենտրոնի տնօրեն Վարդգես Օսիպովը։
Մարտունու բնակիչ Սիրուհի Հարությունյանն առաջնեկի ծնվելուց 10 տարի հետո՝ հունվարի 2-ին, լույս աշխարհ է բերել իր երկրորդ երեխային՝ փոքրիկ Համեստին։
Լույս աշխարհ եկած փոքրիկներից մեկը 5 կգ 450 գրամ քաշով տղան ծնվել է կեսարյան հատման ճանապարհով։
Նորածինների ինտենսիվ հսկողության եւ թերապիայի բաժանմունքի վարիչը վստահեցրել է, որ բաժանմունքում գտնվող եւ խնդիրներ ունեցող երեխաների կյանքին վտանգ չի սպառնում։
Մոր եւ մանկան առողջության պահպանման կենտրոնում նորածինների թիվը նախորդ տարվա նույն ժամանակահատվածի հետ են համեմատում եւ ասում, որ ստեղծված իրավիճակով պայմանավորված նվազում կա։
«Եթե համեմատենք նախորդ տարվա ցուցանիշներին, իհարկե, ծննդաբերությունների նվազում կա։ Դեկտեմբեր ամսին ունեցել ենք 74 ծննդաբերություն, համեմատության համար ասեմ, որ 2020 թվականին միջինը Մոր եւ մանկան առողջության պահպանման կենտրոնում տեղի էր ունենում մոտավորապես 150-ից 160 ծննդաբերություն»,- նշել է Օսիպովը։