Իրանը Ինտերպոլ է ուղարկել «կարմիր իրազեկում» ԱՄՆ նախագահ Դոնալդ Թրամփի կալանավորման մասին, հայտնում է Al Jazeera-ն:
Իրանի դատական համակարգի ներկայացուցիչ Գոլամհոսեյն Էսմաիլին երեքշաբթի մամուլի ասուլիսում հայտնել է, որ Իրանը Ինտերպոլ հարցում է ուղարկել Թրամփի եւ եւս 47 ԱՄՆ պաշտոնատար անձանց կալանավորման մասին, որոնք դերակատարում են ունեցել անցյալ տարի գեներալ Ղասեմ Սոլեյմանիի սպանության մեջ:
«Իրանը անչափ լրջորեն է վերաբերվում այն մարդկանց հետապնդելուն եւ պատժելուն, ովքեր հրաման են տվել եւ կատարել այդ հանցագործությունը»,- լրագրողներին ասել է Էսմաիլին:
Նշվում է, որ սա Թրամփին կալանավորելու մասին Իրանի արդեն երկրորդ հարցումն է:
Ավելի վաղ համանման հարցումը մերժել էր Ինտերպոլի Ֆրանսիայի բաժանմունքը, որը հայտարարել էր, որ երկրի Սահմանադրությունն արգելում է կազմակերպությանն իրականացնել քաղաքական, ռազմական, կրոնական կամ ռասայական բնույթի ցանկացած միջամտություն կամ գործունեություն:
Սոլեյմանին զոհվել է 2020 թվականի հունվարի լույս 3-ի գիշերը Բաղդադի օդանավակայանի շրջանում ԱՄՆ հրթիռային հարվածի հտեւանքով: Ի պատասխան՝ Թեհրանը հունվարի լույս 8-ի գիշերը հրթիռային հարված էր հասցրել Իրաքում երկու օբյեկտների՝ Այն էլ Ասադ բազային եւ Էրբիլի օդանավակայանին, որոնք օգտագործում էին ամերիկացի զինվորականները: Իրանի ղեկավարությունը բազմիցս հայտարարել է, որ անպայման վրեժխնդիր կլինի Սոլեյմանիի սպանության համար:
