Ամենայն Հայոց կաթողիկոս Գարեգին Բ-ն հունիսի 10-15-ը Վրաստան կատարելիք այցի ընթացքում կհանդիպի վրաց պատրիարք Իլյա 2-րդի հետ, հաղորդում է «Պիրվելի» գործակալությունը:
Այցի ընթացքում քննարկվելու են հայ եւ վրաց եկեղեցիների փոխհարաբերություններին առնչվող հարցեր: Կայանալու է նաեւ Գարեգին Բ-ի այցը Ջավախք եւ հանդիպումը տեղի հայերի հետ:
Հայաստանյան լրատվամիջոցների փոխանցմամբ, այցի ընթացքում քննարկվելու են վիճելի եկեղեցիների հարցը, նաեւ դրվելու է Վրաստանում ՀԱԵ-ին իրավաբանական կարգավիճակ տալու հարցը: «Տվյալ փուլում ոչինչ չեմ կարող ասել վիճելի եկեղեցիների մասին: Երբ պատվիրակությունը ժամանի, կնշվեն քննարկվող հարցերը: Ինչ վերաբերում է իրավաբանական կարգավիճակին, դա պետության գերակայությունն է: Իր հերթին Վրացական պատրիարքությունը դեմ չէ, որ հայկական, կաթոլիկ, հրեական համայնքները կարգավիճակ ունենան Վրաստանում»,- ասել է վրաց միտրոպոլիտ Գերասիմը:
