Ուգանդան Facebook-ին մեղադրել է իր ընտրություններին միջամտելու մեջ՝ այն բանից հետո, երբ Ուգանդայի նախագահ Յովերի Մուսեւենիի նախընտրական արշավի հետ կապված մի քանի հաշիվներ հեռացվել են:
Նախագահի մամուլի քարտուղար Դոն Վանյաման Associated Press գործակալությանը հայտնել է, որ Facebook-ի գործողություններն ապացուցում են այն, ինչ Ուգանդայի իշխանությունները համարում են արտաքին աջակցություն Բոբի Վայնին՝ հինգշաբթի կայանալիք նախագահական ընտրությունների ընդդիմության առաջատար թեկնածուին:
«Facebook-ը միջամտում է Ուգանդայի ընտրական գործընթացներին»,- ասել է նա: «Եթե մարդիկ ցանկանում էին դրսից միջամտելու ապացույցներ, ապա այժմ դրանք ունեն»:
Facebook-ը հայտարարել է, որ հեռացրել է այն էջերը, որոնք «կեղծ եւ կրկնօրինակ հաշիվներ էին օգտագործում՝ էջերը կառավարելու, այլ մարդկանց բովանդակությունը մեկնաբանելու, իրենց որպես օգտատերեր ներկայացնելու եւ խմբերում հաղորդագրությունները վերահրապարակելու համար՝ դրանք ավելի հանրաճանաչ դարձնելու համար: Հաշվի առնելով Ուգանդայում կայանալիք ընտրությունները՝ մենք արագ քայլեր ձեռնարկեցինք այս ցանցը հետաքննելու եւ հեռացնելու ուղղությամբ»:
Ցանցը կապված է Ուգանդայի տեղեկատվության եւ կապի տեխնոլոգիաների նախարարության հետ, ասված է սոցիալական ցանցի հայտարարության մեջ:
