ՄԱԿ գլխավոր քարտուղար Անտոնիո Գուտերեշը Անվտանգության խորհրդին եւ Գլխավոր ասամբլեայի նախագահին տեղեկացրել է երկրորդ ժամկետի համար իր թեկնածությունը առաջադրելու մտադրության մասին, հաղորդում է Reuters-ը:
Նրա առաջին ժամկետը լրանում է այս տարվա վերջին: Անվտանգության խորհրդին եւ Գլխավոր ասամբլեայի նախագահին ուղղված նամակում Գուտերեշն ասում է. «Ինձ համար պատիվ կլինի շարունակել ծառայել Կազմակերպությանը` իր նպատակներին հասնելու համար: Պաշտոնը ստանձնելուց ի վեր ես պատիվ եմ ունեցել աշխատել ՄԱԿ-ի բարեփոխման համար՝ հանուն անդամ-պետությունների նկրտումների բավարարման, ձգտելով մարդկանց արժանապատվությանը եւ բարեկեցությանը, միաժամանակ ապահովելով մեր մոլորակի կայունությունը գալիք սերունդների համար»:
Նրա խոսքով՝ ինքը պատրաստ է Գլխավոր ասամբլեային ներկայացնել իր երկրորդ ժամկետի վերաբերյալ տեսլականի հայտարարությունը եւ մասնակցել անդամ-պետությունների հետ ոչ պաշտոնական քննարկումներին:
Գլխավոր քարտուղար դառնալուց առաջ Գուտերեշը 1995-2002 թվականներին եղել է Պորտուգալիայի վարչապետ, այնուհետեւ 2005-2015 թվականներին՝ ՄԱԿ-ի փախստականների գործակալության ղեկավար: