Վաշինգտոնյան վարչակազմի որոշումը Եվրամիությունից ներկրվող արտադրանքի որոշակի տեսակների համար մաքսատուրք սահմանելու մասին ուժի մեջ է մտնում երեքշաբթի ԱՄՆ Արեւելյան ափի ժամանակով 00.01-ին, փոխանցում է ՏԱՍՍ-ը:
Արդյունքում հունվարի 12-ից Ֆրանսիայում եւ Գերմանիայում արտադրվող պահեստամասերից, որոնք անհրաժեշտ են ավիաշինության համար, 15 տոկոսի չափով մաքսատուրք կհարկվի: Reuters գործակալության պարզաբանմամբ՝ ԱՄՆ-ն ավելի վաղ արդեն 15 տոկոսի մաքսատուրք էր մտցրել ԵՄ-ից ներմուծվող օդանավերի համար: Սակայն այս միջոցառումը չէր կիրառվել Airbus եվրոպական կորպորացիայի օդանավերի համար, որը հավաքվում է ԱՄՆ Ալաբամա նահանգի գործարանում: Պահեստամասերի համար մտցվող սակագները, ըստ էության, Airbus-ին կզրկեն իրենց արտադրանքը ԱՄՆ-ում վաճառելու հնարավորությունից՝ առանց լրացուցիչ մաքսատուրքերի վճարման: Արդյունքում, Reuters-ի կարծիքով, ամերիկյան շուկայում «այդ օդանավերը, հավանաբար, ոչ մրցունակ կլինեն»:
Բացի ավիացիոն արդյունաբերության հետ կապված պահեստամասերի մաքսատուրքերից, 25 տոկոսի լրացուցիչ մաքսատուրքեր են մտցվում Ֆրանսիայից եւ Գերմանիայից ներմուծվող գինիների, կոնյակի որոշ տեսակների եւ ալկոհոլային արտադրանքի մի շարք այլ ապրանքների համար:
ԱՄՆ իշխանությունների գործողությունները նոր քայլ են ԱՄՆ-ի եւ ԵՄ-ի միջեւ ավիաարտադրողների սուբսիդավորման հարցերով բազմամյա վեճի շրջանակում: Խոսքը ամերիկյան Boeing ընկերության եւ Airbus-ի դատական վեճի մասին է:
Boeing-ի եւ Airbus-ի շուրջ Վաշինգտոնի եւ Բրյուսելի առեւտրային վեճը շարունակվում է 2004 թվականից: Երկու կողմերն էլ միմյանց մեղադրում են Առեւտրի համաշխարհային կազմակերպության նորմերի խախտման եւ իր ինքնաթիռաշինարարներին չթույլատրված պետական դոտացիաներ տրամադրելու մեջ: 2019 թվականին ԱՀԿ վեճերի կարգավորման մարմինն արձանագրել էր կազմակերպության նորմերի խախտման առկայություն Airbus-ի գործում, ինչը ԱՄՆ կողմից փոխհատուցող մաքսատուրքեր մտցնելու օրինական իրավունք էր տվել: Սակայն 2020 թվականին համանման որոշում էր կայացվել ԵՄ-ի օգտին Boeing-ի գործով:
ԱՄՆ գործող նախագահ Դոնալդ Թրամփի վարչակազմը 2019 թվականին արդեն Airbus-ի գործով շուրջ 7,5 մլրդ դոլար ընդհանուր գումարով մաքսային սակագներ սահմանել էր ԵՄ-ի դեմ: Եվրամիությունն իր հերթին նոյեմբերին տարեկան ընդհանուր 4 մլրդ դոլարի նոր տուրքեր էր սահմանել ԱՄՆ-ից գյուղատնտեսական եւ արդյունաբերական ապրանքների համար: Դրա պատասխանն էր եղել Միացյալ Նահանգների կողմից հերթական լրացուցիչ մաքսատուրքերի սահմանումը: