Ակնկալվող թանկացող ապրանքների ու ծառայությունների շարքում կլինի նաեւ էլեկտրաէներգիան։ Արցախյան պատերազմի հետեւանքով հայ սպառողներն այսուհետեւ ստիպված կլինեն հոսանքի դիմաց ավելի շատ վճարել, Ազգային ժողովի հանձնաժողովի նիստում ասել է տարածքային կառավարման եւ ենթակառուցվածքների փոխնախարար Հակոբ Վարդանյանը՝ պատասխանելով Արցախում զգալի թվով ՀԷԿ-երի կորստի հետեւանքներին առնչվող հարցին: Արցախում կորցրել ենք 8-10 մեգավատտ հզորությամբ մի քանի տասնյակ ՀԷԿ-եր եւ ստացվել է, որ առաջ Արցախն էր Հայաստան էլեկտրաէներգիա մատակարարում, այսուհետեւ լինելու է հակառակը։
Մոսկվայի եռակողմ բանակցություններում հայկական օրակարգը տապալվել է, համոզված է «Լուսավոր Հայաստան» խմբակցության ղեկավար Էդմոն Մարուքյանը։ Ըստ նրա՝ եթե այլ վարչապետ մեկներ Մոսկվա՝ արդյունքը այլ կլիներ։
«Կոնսենսուս մինուս մեկն» ուժի մեջ է, նշել է Մարուքյանը: Վաղը նա պետաիրավական հանձնաժողովում ներկայացնելու է ճանապարհային քարտեզ, որպես ԱԺ հայտարարության որոշման նախագիծ, որի առաջին կետը պարտության սիմվոլ վարչապետի հրաժարականն է:
Ռուսաստանի նախագահի մամուլի խոսնակ Դմիտրի Պեսկովը հաստատել է տեղեկությունը, որ ռուս բժիշկներն այցելել են Նիկոլ Փաշինյանին եւ Իլհամ Ալիեւին նախքան նրանց ժամանումը Մոսկվա եւ Վլադիմիր Պուտինի հետ հանդիպումը: Պեսկովը, սակայն, չի նշել բժիշկների այցի նպատակը: Հիշեցնենք, որ հունվարի սկզբին վարչապետի մամուլի ծառայությունը հաղորդել է, որ Փաշինյանը ինքնամեկուսացման մեջ է երկրում «համաճարակաբանական իրավիճակի պատճառով»:
Երեւանում կայացել է մշակույթի գործիչների «Ձայն հայրենյաց» նախաձեռնության մեծ հավաք, որի բոլոր բանախոսները գործող կառավարության հրաժարականը օրվա հրամայականն են համարում։ Երգչուհի Շուշան Պետրոսյանը կոչ է արել չվախենալ, ինչպես վախեցել են այս 3 տարիներին։
Ազգային անվտանգության ծառայության նախկին տնօրեն Գեորգի Կուտոյանի մահվան դեպքի առթիվ հարուցված քրեական գործի նախաքննությունը կասեցվել է: Քննչական կոմիտեի լրատվական ծառայությունից NEWS.am-ին հայտնել են, որ այդպիսի որոշում է կայացվել, քանի որ հայտնի չէ անձը, որը գործով պետք է ներգրավվի որպես մեղադրյալ:
Հիշեցնենք, որ անցած տարվա հունվարի 17-ին Երեւանի իր բնակարանում հայտնաբերվել էր ԱԱԾ նախկին պետ Գեորգի Կուտոյանի դին՝ հրազենային վիրավորումով: Հիմնական վարկածը ինքնասպանությունն էր։
Առողջապահության նախարարության հիվանդությունների վերահսկման կենտրոնի փոխտնօրեն ղեկավար Գայանե Սահակյանը լրագրողներին հայտնել է, որ Հայաստանում կորոնավիրուսային վարակի հետ կապված համաճարակային իրավիճակի կայունացում է նկատվում։ Սակայն, ըստ նրա, քանի որ ամանորին մարդիկ շատ են շփվել միմյանց հետ, կանխատեսվում է, որ առաջիկայում կորոնավիրուսի որոշակի աշխուժացում կլինի:
Անցած մեկ օրում Հայաստանում գրանցվել է կորոնավիրուսով վարակվելու 355 նոր դեպք:
Վիրուսի հետեւանքով մահացել է 10 քաղաքացի, արձանագրվել է մահվան եւս 5 դեպք, երբ COVID-19-ով վարակվածի մահը վրա է հասել այլ հիվանդության պատճառով: Մահացածների ընդհանուր թիվը 3648 է:
ԱՄՆ դոլարի փոխարժեքը նախորդ օրվա համեմատ աճել է 1.68 դրամով եւ հասել 525.44 դրամի: Եվրոյի փոխարժեքն աճել է 2.20 դրամով ու հասել 639.04 դրամի, բրիտանական ֆունտի փոխարժեքն աճել է 7.94 դրամով ու կազմել 714.65 դրամ, իսկ ռուսական ռուբլու փոխարժեքն աճել է 0.06 դրամով ու կազմել 7.09 դրամ:
Հունվարի 13-ին Հայաստանում սպասվում է առանց տեղումների եղանակ: Օդի ջերմաստիճանի աստիճանական բարձրացումը կշարունակվի: Երեւանում եւս տեղումներ չեն լինի: Առաջիկա գիշերը մայրաքաղաքում կլինի -2-4, վաղը ցերեկը՝ 0+2: