Ճապոնիայի կառավարությունը կորոնավիրուսի պատճառով մտադիր է դադարեցնել 11 երկրներից եւ տարածաշրջաններից, որոնց հետ գործում են համապատասխան երկկողմ համաձայնագրեր, բիզնեսմենների համար միգրացիոն մեղմացումները: NHK հեռուստաալիքը հայտնում է, որ այսպիսով օտարերկրացիների համար նոր վիզաներով Ճապոնիա մուտքը փաստացի ամբողջությամբ արգելված է:
Ճապոնիայի իշխանությունները կորոնավիրուսի նոր շտամի հայտնաբերման պատճառով դեկտեմբերի 28-ից մինչեւ հունվարի վերջը դադարել են վիզաներ տրամադրել աշխարհի բոլոր երկրների ու տարածաշրջանների քաղաքացիներին: Հիմա կարող են Ճապոնիա մուտք գործել միայն ճապոնացի քաղաքացիները եւ այստեղ մշտապես բնակվող ու երկարաժամկետ վիզաներ ունեցող օտարերկրացիները: Եթե նրանք վերադառնում են այն երկրներից, որտեղ հայտնաբերվել է վիրուսի նոր շտամը, սահմանն անցնելիս անհրաժեշտ է ունենալ կորոնավիրուսի ախտորոշման բացասական թեստի առկայության մասին փաստաթուղթ, որը տրվել է ժամանելուց առաջ 72 ժամվա ընթացքում: Նրանք եւս մեկ թեստ էլ պետք է հանձնեն ժամանման օդանավակայանում:
Ընդ որում՝ Ասիայի 11 երկրների եւ տարածաշրջանների, ներառյալ Չինաստանի, Հարավային Կորեայի, Թաիլանդի, Վիետնամի, Սինգապուրի, Մալայզիայի, բիզնեսմենների եւ բիզնես պատվիրակությունների մուտքը չի սահմանափակվել: Սակայն, ինչպես նշվում է, Ճապոնիայի իշխանությունները որոշել են չեղյալ հայտարարել այդ մեղմացումները:
Ճապոնիայում համաճարակային իրավիճակը սկսել է վատթարանալ անցյալ տարվա նոյեմբերից, իսկ դեկտեմբերին վարակվածների եւ մահվան դեպքերի թվի օրական աճի ռեկորդները սկսել են պարբերաբար թարմացվել, հունվարին ինֆեկցիայի տարածումը հասել է պայթյունավտանգ արագության: Մինչ օրս Ճապոնիայում ավելի քան 4 հազար մարդ դարձել է կորոնավիրուսի զոհ, իսկ վարակման ընդհանուր դեպքերի թիվը գերազանցել է 300 հազարը:
