Ադրբեջանի, Թուրքիայի եւ Պակիստանի արտաքին գործերի նախարարները պայմանավորվել են ակտիվացնել համագործակցությունը, հաղորդում է Anadolu-ն:
Նախարարի հայտարարության համաձայն, որն ընդունվել է Իսլամաբադում, Անկարան, Իսլամաբադը եւ Բաքուն պայմանավորվել են ակտիվացնել համատեղ ջանքերը «իսլամաֆոբիայի, խտրականության ու մահմեդական փոքրամասնությունների հետապնդումների դեմ պայքարում, մասնավորապես տարածաշրջանային եւ միջազգային ֆորումներում՝ խորը մտահոգություն հայտնելով մարդու իրավունքների լուրջ խախտումների եւ մարդկության դեմ ուղղված հանցագործությունների կապակցությամբ, որ տարբեր երկրներում իրականացվում են մահմեդական համայնքների դեմ»:
«Խորը մտահոգություն հայտնելով Ջամուում եւ Քաշմիրում մարդու իրավունքների լուրջ խախտումների շարունակման միակողմանի գործողությունների եւ Ջամուի ու Քաշմիրի ժողովրդագրական կառուցվածքը փոխելու ջանքերի կապակցությամբ՝ նախարարները նաեւ հաստատել են իրենց սկզբունքային դիրքորոշումը Ջամուի եւ Քաշմիրի շուրջ վեճի խաղաղ կարգավորման վերաբերյալ՝ համաձայն ՄԱԿ Անվտանգության խորհրդի համապատասխան դրույթների:
Նրանք նաեւ պայմանավորվել են աջակցել Կիպրոսի հիմնախնդրի արդարացի, կայուն, իրատեսական եւ փոխընդունելի, ինչպես նաեւ Էգեյան ծովի եւ արեւելյան Միջերկրական ծովի խնդիրների կարգավորմանը՝ միջազգային իրավունքի հիման վրա»:
Հայտարարության մեջ հիշատակվում է ղարաբաղյան հակամարտությունը, որի համատեքստում նախարարները աջակցություն են հայտնել «Ադրբեջանի ինքնիշխանության, տարածքային ամբողջականության եւ միջազգայնորեն ճանաչված սահմանների վրա հիմնված հարաբերությունների կարգավորմանը»: