Հյուսիսատլանտյան միությունը պատրաստ է երկխոսել ՌԴ-ի հետ ռազմական թափանցիկության եւ ռիսկերի նվազեցման շուրջ Բաց երկնքի պայմանագրից Ռուսաստանի դուրս գալու մասին որոշման կապակցությամբ: Այդ մասին ՏԱՍՍ-ին հայտնել է միության պաշտոնական ներկայացուցչի տեղակալ Փիրս Կազալեն:
«Մենք ընդունել ենք Բաց երկնքի պայմանագրից Ռուսաստանի դուրս գալու մասին որոշումը որպես ի գիտություն,-ընդգծել է նա:-ՆԱՏՕ-ի երկրները շարունակում են սերտ խորհրդակցությունները Ռուսաստանի եւ ՆԱՏՕ-ի միջեւ ռազմական թափանցիկության եւ ռիսկերի նվազեցման շուրջ»:
Կազալեն հերթական անգամ կրկնել է ԱՄՆ-ի դիրքորոշումը, որով Միացյալ Նահանգները 2020 թվականին հիմնավորել էին պայմանագրից իրենց միակողմանի դուրս գալու որոշումը՝ հնչեցնելով մեղադրանքներ Ռուսաստանի հասցեին Բաց երկնքի պայմանագրի դրույթները Մոսկվայի կողմից չկատարելու մասին: «Ռուսաստանի կողմից Բաց երկնքի պայմանագրի դրույթների ընտրողական կատարումը ձախողել է Եվրաատլանտյան տարածաշրջանում անվտանգության եւ կայունության ուղղությամբ այդ կարեւոր պայմանագրի ներդրումը: ՆԱՏՕ-ի բոլոր երկրները միտված են զենքի, զինաթափման եւ չտարածման արդյունավետ վերահսկողությանը, ինչն անհրաժեշտ պայման է մեր անվտանգության համար»,-պնդել է նա:
Հունվարի 15-ին ՌԴ ԱԳՆ-ն հայտարարել էր, որ Մոսկվան սկսում է ներպետական գործընթացներ Բաց երկնքի պայմանագրից Ռուսաստանի դուրս գալու մասին: