ԱՄՆ ընտրված նախագահ Ջո Բայդենը կսպասի հետախուզության հարցերով իր խորհրդականների խորհուրդներին, թե արժե՞ արդյոք նախագահ Դոնալդ Թրամփին գաղտնի տեղեկատվություն հայտնել պաշտոնից հանրապետականի հեռանալուց հետո: Այս մասին հայտարարել է Սպիտակ տան աշխատակազմի նոր ղեկավար Ռոն Քլեյնն այն բանից հետո, երբ ազգային հետախուզության նախկին գլխավոր փոխտնօրեն Սյու Գորդոնը հոդված է գրել, որում առարկում է Թրամփի հետ նման տեղեկատվության փոխանկմանը այն բանից հետո, երբ նա նախագահի պաշտոնը կթողնի, փոխանցում է Reuters-ը:
«Մենք անպայման կխորհրդակցենք Բայդենի վարչակազմում հետախուզության ոլորտի մասնագետների հետ... եւ կգործենք այդ խորհուրդներին համապատասխան»,- ասել է Քլեյնը:
Գորդոնի խոսքով՝ ցանկացած նախկին նախագահ արտաքին հետախուզության թիրախում է, բայց Թրամփը «կարող է արտասովոր խոցելի լինել չարամիտների համար», ի թիվս այլոց՝ հաշվի առնելով արտասահմանում նրա գործնական շահերը:
Ներկայացուցիչների պալատի հետախուզության հարցերով կոմիտեի նախագահ, Դեմոկրատական կուսակցությունից Ադամ Շիֆը ավելի անկեղծ է եղել. «Ես չեմ կարծում որ նրան (Թրամփին) դա կարելի է վստահել»:
