ՀՀ իշխանություններն ի վիճակի չեն լուծել գերիների հարցը: Այս մասին «Հայելի»-ի հարցազրույցում ասաց իրավապաշտպան, «Իրավական ուղի» ՀԿ համահիմնադիր Ռուբեն Մելիքյանը:
Նա նշեց, որ քաղաքական կյանքն ընթանում է խորհրդարանի պատերից դուրս: Խորհրդարանում ոչ մեծ խումբ կա, որը ցանկացած գնով փորձում է պահպանել իշխանությունը, թե ինչու՝ կարելի է միայն գուշակել:
Հարցին, թե ինչու էր անհրաժեշտ Մոսկվայում հանդիպումից առաջ գերիների հարցի առաջնահերթության մասին հայտարարություն անել, եթե ամեն ինչ ավարտվելու էր «կներեք, չստացվեց» արտահայտությամբ, Մելիքյանը նշեց, որ կամ լրջագույն պետական դավաճանություն է տեղի ունեցել, եւ մարդկանց մեծ մասն այդ կարծիքն ունեն, կամ էլ իշխանությունները դավաճան չեն, այլ ապաշնորհ անձինք, ովքեր ունակ չեն լուծել գերիների հարցը: Լավրովը եւս թափանցիկ ակնարկ արեց, որ մեղավոր են մեր պաշտոնյաները, որոնք չեն ներկայացնում գերիների ցուցակները:
«Մեր կազմակերպությունը պատերազմի կեսերից 24/7 ռեժիմով զբաղվում էր գերիների հարցով, դիմում ՄԻԵԴ-ին: Կան հստակ եւ անուղղակի տվյալներ: Երկրորդի մասով Ադրբեջանը հրաժարվում է համագործակցել»,-նշեց Մելիքյանը: Նա նշեց նոյեմբերի 9-ի հայտարարությունից հետո ՄԻԵԴ վերաբերմունքի փոփոխությունը: «Դիրքորոշումը հետեւյալն է. եթե դուք ուղիղ շփումներ ունեք, եթե նստում եք մեկ սեղանի շուրջ, եւ նույնսիկ (հուսով եմ՝ ճիշտ չէ) խմում եք Ալիեւի առողջության համար, ապա ձեր հարցերն ինքնուրույն լուծեք»,-ասաց Մելիքյանը՝ հավելելով, որ Ադրբեջանը փոխեց վերաբերմունքը՝ նոյեմբերի 9-ից հետո գերիներին ներկայացնելով որպես «ահաբեկիչներ»:
«Հայտարարության մեջ բոլոր հարցերը հստակ ամսաթվով կարգավորվում են, բացի այդ հարցից: Սակայն հարցն այն է, որ այդ հարցը կարգավորվում է Ժնեւի կոնվենցիաներով, եւ պահանջն այն է, որպեսզի մարտական գործողությունների ավարտից հետո բոլոր գերիներն անհապաղ փոխանցվեն: Միեւնույն ժամանակ, նա պնդեց, որ Հայաստանն անհասկանալի պատճառներով հանձնել է բոլոր գերիներին, ընդ որում, երեխայի սպանության համար դատապարտված ահաբեկիչներին առաջինն է հանձնել»,-հիշեցրեց իրավապաշտպանը:
Հարցին, թե արդյոք Փաշինյանը մանիպուլացնում է գերիների հարցը, Մելիքյանը պատասխանել է, որ այժմ գերիների հարցն անկախ քաղաքական հայացքներից բոլորի համար թիվ մեկ խնդիրն է. «Այդ անձի՝ մանիպուլացնելու արվեստը ես երբեք կասկածի տակ չեմ դրել: Նա դրանով օժտված է»: