Արդարադատության նախարարության ներկայացրած օրենսդրական նախաձեռնությունը չի օգնի նվազեցնել կոռուպցիայի բաղադրիչը Հայաստանի դատական համակարգում, այլ ընդհակառակը՝ դրա համար կստեղծի նոր պայմաններ եւ ռիսկեր: Այս մասին ՀՀ Ազգային ժողովի նիստում հունվարի 18-ին «Հայաստանի Հանրապետության Դատական օրենսգիրք» Սահմանադրական օրենքում փոփոխություններ կատարելու մասին օրինագծերի փաթեթի քննարկման ժամանակ ասաց «Լուսավոր Հայաստան» կուսակցության պատգամավոր Անի Սամսոնյանը:
Նրա խոսքով՝ հակակոռուպցիոն դատարանների ստեղծումը կհանգեցնի խտրականության բուն դատական համակարգում:
«Հակակոռուպցիոն դատարանը կհամարվի մասնագիտացված դատարան: Նայում ենք Հակակոռուպցիոն դատարանի նախագահի պաշտոնական աշխատավարձին եւ համեմատում ենք Վճռաբեկ դատարանի նախագահի աշխատավարձի հետ: Ակնհայտ է, որ Հակակոռուպցիոն դատարանի նախագահը ավելի շատ է ստանալու, չնայած երկուսն էլ մասնագիտացված դատարանների նախագահներ են: Նույնը կարելի է տեսնել, երբ Հակակոռուպցիոն դատարանի դատավորի աշխատավարձը համեմատենք Առաջին ատյանի դատարանի դատավորի աշխատավարձի հետ»,- ասաց Սամսոնյանը:
