Դատախազների միջնորդության քննարկում սկսվեց ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստում ընդմիջումից հետո:
Միջնորդության էությունն այն է, որպեսզի պարզվեն նիստերին փաստաբանների հաճախակի բացակայությունների պատճառները:
Փաստաբան Միհրան Պողոսյանը (Յուրի Խաչատուրովի փաստաբանը) ներկայացրեց իր բացակայությունների պատճառները: Պատճառների թվում նա նշեց այլ նիստերին մասնակցությունը, վատ ինքնազգացողությունը, բողոքի ակցիային մասնակցությունը եւ այլն, եւ այդ մասին, նրա խոսքով, դատարանին ժամանակին տեղեկացվել է:
Քանի որ դահլիճը բաժանված է ապակիով երկու մասի, ստացվում է այնպես, որ ելույթի «հիմնական մասերը» լսելի չեն «հանդիսատեսի դահլիճում», ինչի մասին դահլիճի երկրորդ մասում ներկաները բարձրաձայն հայտնել են դատարանին: Ճիշտ է՝ ապարդյուն:
Պատասխանելով փաստաբանի ելույթին՝ դատախազ Գեւորգ Բաղդասարյանը նկատեց, որ առողջության հետ կապված խնդիրները հասկանալի են, իսկ ահա բողոքի ակցիայի մասնակցության իրավունքի իրացումը՝ ոչ: Բաղդասարյանը նկատեց, որ իրավունքների իրացումը, ինչպես եւ այլ նիստերի մասնակցությունը, չպետք է խոչընդոտի արդարադատությանը: Այդ կապակցությամբ նա դատարանին խնդրեց միջոցներ ձեռնարկել, որպեսզի նման բան չկրկնվի:
Ապա պարզվեց, որ դատախազները ներկայացրել են ոչ թե միջնորդություն, այլ առարկություն: Դատարանը որոշեց, որ փաստաբանների բացակության պատճառը՝ նրանց մասնակցությունը Փաստաբանների պալատի համընդհանուր բողոքի ակցիային, չի կարող դիտարկվել որպես ոչ հարգելի պատճառ եւ դատական նիստին խոչընդոտելու մտադրություն: Մնացած բացակայությունների մասով դատարանը նույնպես «հանցանք» չգտավ, սակայն զգուշացրեց, որ բազմաթիվ բացակայությունների դեպքում միջոցներ կձեռնարկի:
Ապա դատավորը հայտնեց, որ պաշտպանությունը միջնորդություն է ներկայացրել դատախազների բացարկի մասին: