ՀՀ երկրորդ նախագահ Ռոբերտ Քոչարյանի փաստաբան Արամ Վարդեւանյանը դատախազ Գեւորգ Բաղդասարյանի բացարկի մասին միջնորդություն ներկայացրեց:
Նրա խոսքով՝ դատախազը սուբյեկտիվ վերաբերմունք ունի դատապարտյալի նկատմամբ, եւ դա ակնհայտ երեւում է: Փաստաբանը հիշեցրեց, որ հենց ներկայիս իշխանության օրոք Բաղդասարյանի մոտ կարիերայի աճ է նկատվել: Փաստաբանը նշեց փոխկապակցվածությունը. Բաղդասարյանի հայտարարություններն ու եզրակացությունները սերտորեն կապված են այդ գործի առնչությամբ իշխանությունների հայտարարությունների հետ: Փաստաբանը կասկածի տակ դրեց դատախազի օբյեկտիվությունն ու սկզբունքայնությունը: Բացի այդ, նա հիշեցրեց, որ չնայած նրան, որ տվյալ գործով նիստերը միշտ անցկացվում են երեքշաբթի օրերին, մայիսի 8-ին, որը երեքշաբթի չէր, նիստ անցկացվեց: Շուշիի ազատագրման օրը (փաստաբանը նշեց՝ նախկինում) նիստ անցկացվեց, եւ դատապարտյալների աթոռին էր Շուշին ազատագրողը, եւ դատախազն իրեն հայտարարություն թույլ տվեց, թե Շուշիի ազատագրումը կապ չունի գործի հետ: «Այժմ Շուշին օկուպացրել են: Եվ շատերի մոտ համոզմունք կա, որ այն հանձնել են: Այժմ դա փաստ է, Արցախի 70 տոկոսը չկա»,-ասաց փաստաբանը: Նա զուգահեռ անցկացրեց Ղարաբաղի եւս մեկ հերոս Աշոտ Մինասյանի ձերբակալության հետ, որտեղ մեղադրող է հանդես գալիս Գեւորգ Բաղդասարյանը:
Փաստաբանը նկատեց, որ հանգամանքների բերումով Գեւորգ Բաղդասարայնը մեղադրող է հանդես գալիս Ղարաբաղի ազատագրողների նկատմամբ շատ գործերով: Միեւնույն ժամանակ, նա հարց ուղղեց, թե ինչու Բաղդասարյանը չի անցնում այնպիսի գործով, ինչպես օրինակ՝ իշխանամետ գործիչների կողմից դատարանների արգելափակումը: «Ինչպե՞ս է ստացվում, որ նա միշտ մեկ կողմում է: Միշտ այնտեղ, որտեղ դա ձեռնտու է իշխանություններին»,-հռետորական հարց է ուղղել փաստաբանը՝ Գեւորգ Բաղդասարյանի բացարկի մասին միջնորդություն ներկայացնելով:
Փաստաբանի ելույթից հետո 5 րոպեանոց ընդմիջում հայտարարվեց:
