Հանրապետական սենատորները դեմոկրատներին խնդրել են մինչեւ փետրվարի կեսեր հետաձգել ԱՄՆ նախկին նախագահ Դոնալդ Թրամփի իմփիչմենթի գործընթաց սկսելը, որ նրան ժամանակ տրվի պատրաստվելու խռովության հրահրման մեղադրանքներից պաշտպանվելուն, փոխանցում է «Ամերիկայի ձայնը»:
Հինգշաբթի ցերեկը հայտնի էր դարձել, որ Ներկայացուցիչները պալատը կարող է արդեն ուրբաթ Սենատի հաստատմանը ներկայացնել անցյալ շաբաթ օրենսդիրների ձայների մեծամասնությամբ ընդունված նախկին նախագահի իմփիչմենթի հոդվածը:
Սենատում հանրապետական փոքրամասնության ղեկավար Միթչ Մաքքոնելը դեմոկրատներին խնդրել է մինչեւ հունվարի 28 հետաձգել իմփիչմենթի հոդվածի փոխանցումը եւ Թրամփին 2 շաբաթ տրամադրել պաշտպանությանը նախապատրաստվելու համար: Սենատի մեծամասնության ղեկավար, դեմոկրատ Չակ Շումերը այս պահին քննարկում է Մաքքոնելի առաջարկը, երեկ երեկոյան հայտնել էր նրա մամուլի քարտուղարը:
Դեմոկրատները Սենատը վերահսկում են նվազագույն առավելությամբ. չնայած Կոնգրեսի վերին պալատում երկու կուսակցությունների միջեւ տեղերը հավասար են բաժանված՝ 50-50, դեմոկրատները հարցերի քննարկման ժամանակ, որոնց համար պահանջվում է ձայների պարզ մեծամասնություն, կարող են հույս դնել փոխնախագահ Քամալա Հարիսի վճռորոշ ձայնի վրա: Ընդ որում՝ դեմոկրատները հանրապետականների հետ համագործակցելու կարիք ունեն Բայդենի կառավարության պաշտոններում թեկնածուների նշանակման եւ ծրագրերի մեծ մասի առաջմղման համար, որոնց իրականացումն առաջարկում է նոր վարչակազմը:
Թրամփն արդեն դարձել է ԱՄՆ պատմության մեջ միակ նախագահըւ, որին երկու անգամ իմփիչմենթ է ներկայացվել Ներկայացուցիչների պալատում, իսկ Սենատում նրա իմփիչմենթի առաջիկա դատավարությունը կդառնա իր տեսակի մեջ միակը, որը տեղի կունենա արդեն այն բանից հետո, երբ նախագահը լքել է իր պաշտոնը: