Ճապոնիայի կառավարությունը հավանություն է տվել կորոնավիրուսով պայմանավորված սահմանափակումները խստացնող օրինագծերին, որոնցով բռնկումը սկսվելու պահից ի վեր առաջին անգամ կանոնները խախտողներին կարող են սպառնալ տուգանքներ եւ բանտարկություն, փոխանցում է AFP-ն:
Տոկիոյում կայանալիք նախկինում հետաձգված Օլիմպիական խաղերից ընդամենը 6 ամիս առաջ մայրաքաղաքը եւ մյուս նահանգները արտակարգ իրադրության մեջ են՝ փորձելով ճնշել Covid-19-ի վարակման ռեկորդային ալիքը:
Բայց ի տարբերություն աշխարհի մյուս երկրներում խիստ արգելքներից՝ Ճապոնիայում հարկադիր կատարման միջոցառումներ չկան. մարդկանց կոչ են անում, այլ ոչ թե հրամայում տանը մնալ, եւ տուգանքներ չկան այն ձեռնարկությունների համար, որոնք անտեսում են ժամկետից շուտ փակելու հարցումները:
Նոր օրենքները իշխանություններին թույլ կտան մարդկանց պատժել եւ նույնիսկ բանտարկել մինչեւ 1 տարով, եթե դրական թեստի դեպքում հոսպիտալացվելուց հրաժարվեն:
Բարերն ու ռեստորանները կտուգանվեն մինչեւ 500 հազար իենով (4800 դոլար), եթե աշխատեն երեկոյան ժամերին:
Ակնկալվում է, որ խորհրդարանը օրինագծերը կընդունի հաջորդ շաբաթ, բայց ընդդիմությունը քննադատությունից հետո, որ դա քաղաքացիական ազատությունների դեմ ոտնձգություն է, պնդելու է հարկադիր հոսպիտալացման հոդվածում փոփոխություններ կատարել:
Չնայած վերջին ալիքին, Ճապոնիայում Covid-19-ի համեմատաբար փոքր բռնկում է, որի հետեւանքով մահացել է ընդհանուր մոտ 4700 մարդ:
Բժիշկները, սակայն, զգուշացնում են, որ հիվանդանոցները ծանրաբեռնված են առավել շատ տուժած նահանգներում՝ մասամբ այն պատճառով, որ մասնավոր հիվանդանոցները հրաժարվում են ընդունել կորոնավիրուսով պացիենտներին:
