Իշխանությունը նպատակ ունի խախտելով ՀՀ Սահմանադրությունն ու օրենքը, ԲԴԽ անդամ նշանակել մարդու, ով լիարժեք կամակատարն է վարչապետի եւ կառավարության: Այս մասին, այսօր՝ հունվարի 22-ին, ԱԺ-ի դիմաց բողոքի ակցիայի ժամանակ հայտարարեց ակցիայի մասնակիցներից մեկը:
«Սա ունի մեկ նպատակ՝ զավթել դատական իշխանությունը, որն անցնող շրջանում ցույց է տվել, որ դեռ կարողանում է պահպանել իր անկախությունը, չի ենթարկվում Նիկոլ Փաշինյանի սադրանքներին, անձնական հրահանգներին ու ցանկություններին: Այսօր ցանկանում են զավթել դատական համակարգը՝ շարունակելու համար իրենց անօրինական գործողությունները, իրենց ճնշումները, ձերբակալությունները, անօրինական դատական որոշումները, մտածելով, թե կկարողանան կանխել իշխանափոխությունը»,-ասաց նա:
Հիշեցնենք, որ քաղաքացիները բողոքի ակցիա էին անում ԱԺ-ի դիմաց՝ ԲԴԽ անդամների ընտրության դեմ։ Նշենք, որ խորհրդարանն այսօր ընտրում է ԲԴԽ անդամների։ Քաղաքացիները նշում են, որ մեր երկրում կան ավելի առաջնային խնդիրներ, ինչպիսիք են գերիների վերադարձն ու զոհվածների մարմինները գտնելը։ Նշենք, որ ԲԴԽ անդամի թեկնածուներն են նախկին զինդատախազ Գագիկ Ջհանգիրյանը, եւ ՀՔԾ պետ Սասուն Խաչատրյանի եղբայր Արմեն Խաչատուրյանը: