Ընդդիմությունն այսօր ունի մեկ նպատակ՝ իշխանություն ստանձնելը։ Այս մասին այսօր՝ հունվարի 25-ին, լրագրողների հետ զրույցում հայտարարեց ԱԺ «Իմ քայլը» խմբակցության պատգամավոր Արփի Դավոյանը։
«Իմ կարծիքը, որը վերաբերում էր ընդդիմությանը, որեւէ փոփոխություն չի կրել, եւ ես բացատրել եմ, թե ինչու եմ այդպես կարծում։ Իսկ ի՞նչ է փոխվել իմ ելույթից հետո։ Ցանկացած երկրում պետք է լինի առողջ ընդդիմություն։ Ընդդիմությունը յուրաքանչյուր երկրի զարգացման համար կարեւոր ինստիտուտ է։ Սակայն այսօր ընդդիմությունն ունի մեկ օրակարգ՝ իշխանություն ստանձնելը։ Այդ մարդիկ չունեն առողջ քննադատություն եւ իրենց ողջ խոսքը կառուցում են դրա շուրջը։ Երբ ընդդիմությունը, որը նման տեքստերով հանդես գալիս ժողովրդի նկատմամբ, չի կարող խնդիր չհամարվել»,- ասաց Դավոյանը։
Ըստ Դավոյանի՝ ընդդիմությունը գերիների մասին չպետք է բարձրաձայնի, քանի որ այն շատ նուրբ եւ զգայուն թեմա է։
«Գերիների հարցով եղավ փակ քննարկում եւ բացատրվեց թե ինչու է փակ, քանի որ գերիների հարցը շատ նուրբ եւ զգայուն թեմա է։ Գերիների հարցով բարձրաձայն խոսել կարող է վնասել նրանց վերադարձին, սակայն այդ մարդիկ շարունակում են բարձրաձայն խոսել։ Հայաստանի համար առաջնային խնդիրներից է գերիների վերադարձը, սակայն դրա մասին ամեն օր բարձրաձայն խոսել, քննադատել, ասել, որ անուններ չեք հրապարակում որեւէ կերպ չեն օգնում։ Այլ կարծիք լինել չի կարող, որ պետք է անհապաղ վերադարձնել հայրենիք, իսկ դրա շուրջը հավաքել դիվիդենտներ անթույլատրելի է»,- նշեց Արփի Դավոյանը։
Արփի Դավոյանի կարծիքով՝ հասարակությունը բաժանված է եղել սեւ եւ սպիտակների նախքան հեղափոխությունը, եւ մարդիկ, որոնք խոչընդոտում էին հեղափոխությանն այժմ ցանկանում են վարկաբել իշխանությանը։
«Դուք տեսե՞լ եք ընդդիմության ներկայացուցիչներն ինչպես են խոսում ժողովրդի մասին։ Նույն մարդիկ, որոնք հեղափոխության ժամանակ դեմ են արտահայտվում, հիմա դարձել են ընդդիմություն եւ դեմ են արտահայտվում իշխանությանը։ Որեւէ բան չի փոխվել, նույն մարդիկ են ,մնացել։ Այն մարդիկ, որոնք խոչընդոտում էին հեղափոխությանը, հիմա էլ վարկաբեկում են իշխանությանը։ Մարդիկ չեն փոխվել ուղղակի տեղերն են փոխվել։ Այն ժամանակ նրանք իշխանություն են, հիմա՝ ընդդիմություն։ Տարիներ առաջ մենք տեսել ենք սեւ ու սպիտակների բաժանումը, ավելի շուտ, քան դրա մասին հայտարարվեց։ Երբ մարդիկ ազատ խոսքի իրավունք չեն ունեցել, եղել են արտոնյալներ եւ ոչ արտոնյալներ։ Մենք եկել ենք այդ կարգախոսով, որպեսզի Հայաստանի Հանրապետությունում լինի երջանիկ անհատ, հոգատար հասարակություն, հզոր պետություն, այդ քայլերն ամրագրված են մեր ծրագրում։ Ես կարծում եմ, որ 2․5 տարին շատ քիչ էր դրան հասնելու համար հաշվի առնելով թե ինչերի միջով անցանք։ Պատերազմի վաղ դադարեցվելու մասին խոսակցությունները նույնպես շահարկումներ են, որոնք արվում են կոնկրետ մարդկանց կողմից։ Սակայն արվել է անհնարինը, որպեսզի պատերազմը շուտ ավարտվի»,- ասաց Դավոյանը։